Малітва за Курапаты ў фотаздымках: рэпартаж «Новага Часу»
Пасля малебна ў цэнтры Мінска частка ўдзельнікаў паехала ў Курапаты. Некаторыя – не без прыгодаў. Тралейбус з Леанідам Кулаковым суправаджаў сіні мікрааўтобус.
Яшчэ ля кафедральнага сабора Леанід заўважыў, што «ціхары» за ім сочаць. «Мабыць, таму што сцяг трымаў» – выказаў ён думку і запрасіў журналістаў прайсціся на прыпынак і зняць, як яго будуць «браць». Разам з усёй кампаніяй накіраваліся і двое «іхтамнетаў», якія селі і ў тралейбус. У раёне плошчы Бангалор за тралейбусам прыладкаваўся сіні мікрааўтобус (апошнімі часамі «сіні бус» – выраз амаль такі ж шматзначны, як «чорны варанок»).
Леанід спрабаваў размаўляць з супрацоўнікам у цывільным і нават жартаваць, маўляў, калі браць будзеце? Той толькі пасміхаўся. Раптам на Гамарніка «іхтамнеты» выйшлі з тралейбуса, а актывісты спакойна дабраліся да Курапатаў.
Шмат людзей прыехала ва ўрочышча ад кафедральнага сабора, але вялікая частка была новых твараў. Малебен служылі святары Беларускай аўтакефальнай праваслаўнай царквы айцец Вікенці і айцец Леанід. На малітве прысутнічала не менш за паўтары сотні чалавек. Пасля малебна выступалі актывісты Ганна Шапуцька, Зміцер Захарэвіч, Вячаслаў Сіўчык, Алесь Чахольскі і іншыя. З Галгофы частка людзей накіравалася на вахту да рэстарана «Поедем поедим».
Фота Алены Ляшкевіч