«Маму ўдарылі ў твар — здаецца, яна адразу страціла прытомнасць». У Гомелі схапілі 66-гадовую выкладчыцу

«Свабодзе» стала вядома аб затрыманні ў Гомелі выкладчыцы Беларускага дзяржаўнага ўніверсітэта транспарту Валерыі Дзяцук. Яна — кандыдат хімічных навук, выкладае экалогію.

Выглядае, што 66-гадовую жанчыну затрымалі за каментар у тэлеграме, але дакладна сваякам ніхто нічога не тлумачыў.

«Ранкам 7 сакавіка ў кватэру пазванілі. Дзверы адчыніў тата — і ў хату ўварваліся пяць чалавек. Закрычалі: "Усім ляжаць, працуе АМАП!" Маці, тату і мяне збілі з ног, паклалі тварам у падлогу. Нічога не тлумачылі абсалютна, сказалі толькі: "Мы яе забіраем". Маму ўдарылі ў твар — мне падалося, яна адразу страціла прытомнасць. Яна была яшчэ ў начной бялізне, ёй нават не давалі адзецца — маўляў, толькі пры нас, а то нож схавае пад адзенне. Калі выводзілі, яна плакала», — распавёў Сяргей, сын затрыманай.

Паводле Сяргея, у маці адразу забралі смартфон і нешта на ім сфатаграфавалі. «Пазней я даведаўся, што яны сфатаграфавалі каментар маці, які яна пакінула пад нейкім відэа на нейкім тэлеграм-канале. Што ёй інкрымінуюць — дагэтуль невядома», — кажа жыхар Гомеля.

Сяргей гаворыць, што яго амапаўцы аднеслі ў іншы пакой, дзе з ім размаўляў невядомы, які прадставіўся начальнікам аддзела. «Ён сказаў, што асабіста за нас узяўся і мы ўсе будзем сядзець. За што — не зразумела... У ІЧУ, дзе яна цяпер знаходзіцца, ад мяне ўзялі толькі цёплую вопратку — прадукты адмовіліся браць», — дадаў Сяргей.

9 сакавіка Валерыю павінны судзіць, аднак па-ранейшаму невядома, за што і а якой гадзіне. Таксама Сяргей гаворыць, як чуў, што ў дачыненні да маці могуць пачаць крымінальную справу паводле арт. 130 КК («Распальваньне расавай, нацыянальнай, рэлігійнай альбо іншай сацыяльнай варожасці») і перавесці ў СІЗА.

Раней Валерыю Дзяцук не затрымлівалі.

Гэтая публікацыя падрыхтаваная з выкарыстаннем інфармацыі БелаПАН.