Мінгарвыканкам: «Сітуацыю з прыватнымі ўстановамі адукацыі трэба браць пад кантроль»
Колькасць устаноў адукацыі прыватнай формы ўласнасці ў сталіцы расце. Такую тэндэнцыю адзначыў падчас выступу на жнівеньскім педагагічным форуме старшыня Мінгарвыканкама Анатоль Сівак, перадае карэспандэнт агенцтва «Мінск-Навіны».
Фота Тамары Хаміцэвіч
— Апошнім часам у Мінску назіраецца рост школ прыватнай формы ўласнасці. У мінулым навучальным годзе 880 навучэнцаў атрымлівалі агульную сярэднюю адукацыю ў 12 прыватных установах. У цяперашні час колькасць такіх навучальных устаноў складае 18. Прычым толькі чатыры з іх прайшлі адпаведную акрэдытацыю, — сказаў Анатоль Сівак. — Адначасова назіраецца і іншая тэндэнцыя: з павелічэннем колькасці прыватных устаноў адукацыі расце і колькасць зваротаў грамадзян па розных пытаннях арганізацыі навучальнага працэсу ў іх. Цалкам дакладна: сітуацыю трэба браць пад кантроль. І камітэту, і раённым упраўленням па адукацыі неабходна актыўна вывучаць якасць адукацыі, якая прадастаўляецца, кантраляваць выкананне санітарных норм і правілаў у прыватных установах. Таксама важна працягваць ужо акрэсленае супрацоўніцтва, прыцягваць спецыялістаў для ўдзелу ў мерапрыемствах па павышэнні кваліфікацыі, абмену педагагічным вопытам. І, безумоўна, запрашаць школьнікаў на гарадскія і раённыя падзеі.
