Міністэрства культуры: “Журналістаў творчымі работнікамі яшчэ не прызнавалі...”

Прэс-служба ГА “БАЖ” спрабуе разабрацца, ці могуць журналістаў прызнаць творчымі работнікамі і, адпаведна, вызваліць ад уплаты падатку на дармаедства.



Сёлетні дэкрэт Аляксандра Лукашэнкі “Аб папярэджанні сацыяльнага ўтрыманства” мала каго ў Беларусі пакінуў абыякавым. Закрануў ён і журналістаў-фрылансераў — людзей, якія стала не працуюць у штаце якой-кольвек рэдакцыі і, адпаведна, вымушаныя будуць заплаціць.

Падатак не тычыцца штатных супрацоўнікаў, а таксама тых, хто самастойна сплаціць 20 базавых велічыняў у дзяржаўную казну. Але што рабіць, калі ты не напрацаваў сёлета на падатак у 3 мільёны 600 тысяч, але з’яўляешся журналістам ці рэдактарам уласнага сайту?

Паводле пазнейшага прэзідэнцкага ўказу №251 ад 19 чэрвеня 2015 г., ад уплаты згаданага падатку вызваляюцца таксама сябры творчых саюзаў і творчыя работнікі.

ГА “БАЖ”, паводле Статуту, творчым саюзам не з’яўляецца — гэта саюз, створаны па прафесійнай прыкмеце. Таму сяброўства ў БАЖ ніяк не паўплывае на сітуацыю.

А вось статус творчага работніка і вызваленне ад падатку можа надаць адмысловая камісія, створаная пры Міністэрстве культуры. Між тым, як высветлілася, ніхто з нашых калег пакуль туды не звяртаўся.  

Сакратар камісіі Аксана Арцюшэўская кажа, што на разгляд прыходзяць у асноўным заявы ад мастакоў, пісьменнікаў, народных майстроў.

— Сябры камісіі схільныя прызнаваць творчымі работнікамі менавіта такіх людзей. Журналістаў жа пакуль не прызнавалі. Такой пазіцыі прытрымліваюцца і прадстаўнікі Міністэрства інфармацыі, якія ўваходзяць у камісію. Але прэцэдэнтаў пакуль не было — ні адмоўных, ні станоўчых, — кажа Аксана Арцюшэўская.

Прадстаўніца Міністэрства культуры прапанавала выпрабаваць гэтую магчымасць і параіла разам з заявай, якая пішацца ў адвольнай форме, дасылаць як мага больш прыкладаў сваёй творчай дзейнасці.

Прэс-служба ГА “БАЖ” папрасіла калегу, што рэдагуе ўласны сайт для дзяцей, накіраваць у Мінкульт заяву аб прызнанні яе творчым работнікам. На разгляд заявы заканадаўства дае чыноўнікам месяц.

 Барыс Гарэцкі, прэс-служба ГА "БАЖ"