На беларуска-польскай мяжы захрас з бежанцамі камерунец Зомо. Ён праславіўся падчас футбольнага Еўра-2020

Камерунец Зомо, які стаў негалосным сімвалам футбольнага Еўра-2020 у Пецярбургу, затрымаўся пры пераходзе беларуска-польскай мяжы. Як паведаміў «Фантанцы» 15 кастрычніка ягоны знаёмы, Зомо спрабаваў перасячы мяжу разам з уцекачамі, але іх не пусцілі польскія памежнікі, а назад іх не пускаюць ужо беларускія вайскоўцы.

На сувязь Зомо перастаў выходзіць тры тыдні таму, сказаўшы, што знаходзіцца па справах у Маскве. На днях ён даслаў свайму знаёмаму з Краснадара фатаграфіі з беларуска-польскай мяжы і апісаў складаную сітуацыю, у якой апынуўся.

«Я не валодаю ўсёй карцінай таго, што адбылося, але мяркую, што ён хацеў перасячы беларуска-польскую мяжу з патокам афганскіх і іранскіх мігрантаў. У Расіі ў сілу розных прычын ён не змог пабудаваць годнае жыццё і на працягу больш трох гадоў проста выжываў. У Францыі ў яго шмат сваякоў, плюс яго родная мова —французская. Думаю, ён імкнуўся менавіта туды. Але, як і некалькі сотняў бежанцаў, быў заблакаваны польскімі мытнікамі з аднаго боку і беларускімі — з другога. Ні адзін з бакоў не хоча прымаць іх. Да іх не прапускаюць гуманітарку па гэтай жа прычыне. Людзі пачынаюць паміраць ад пераахаладжэння і голаду», — напісаў знаёмы Зомо.

Зомо — ураджэнец Камеруна. Некалькі гадоў таму ён перабраўся ў Краснадар. На час футбольнага Еўра-2020 ён прыехаў у Пецярбург. Зомо размалёўваў сябе ў колеры сцяга Расіі і спяваў песні каля «Газпрам Арэны" і на Неўскім праспекце разам з іншымі заўзятарамі. Дзякуючы яркай знешнасці і гучным паводзінам прыцягнуў увагу гараджан, гасцей горада і СМІ.