Няма гарачай вады, не працуе сліў у прыбіральні, з'явіліся вошы. Леўчанка пра нечалавечыя ўмовы на Акрэсціна
У судзе Ленінскага раёна сёння судзяць вядомую баскетбалістку Алену Леўчанку за ўдзел у несанкцыянаваным мерапрыемстве — на гэты раз 20 верасня (ч.1 арт. 23.34 КаАП). Раней яна ўжо правяла 15 сутак на Акрэсціна па тым жа артыкуле, але за ўдзел у Маршы 23 жніўня.
Так выглядае на судзе Алена Леўчанка. Працэс праходзіць па відэасувязі. Фота: @zhannanovik_, Twitter
Да пачатку пасяджэння адвакату Андрэю Мачалаву далі 10 хвілін на перамовы з падабароннай. Падчас іх размовы зайшоў сакратар, таму адвакат хадайнічаў аб яго адводзе. Суддзя Таццяна Шоцік адмовіла, але дала яшчэ 10 хвілін.
Падчас суда спартоўка распавяла пра ўмовы ўтрымання: няма гарачай вады, нельга хадзіць у душ, не працуе сліў у прыбіральні, «а гэта рассаднік бактэрый», аднойчы не выводзілі гуляць 5 дзён, забралі матрац, забралі пасцельную бялізну, пагоршылася здароўе, з'явіліся вошы.
Сведка Шарапаў на суд не з'явіўся. Адвакат Алены адзначыў, што ў пратаколе справы пазначана, што Леўчанка на мітынгу выступала за сумленныя выбары. А ў пратаколе допыту сведкі ёсць словы Шарапава, дзе ён паказаў, што Леўчанка выступае супраць сумленных выбараў. Адвакат папрасіў выклікаць сведку для ўдакладнення гэтага супярэчнасці. Суддзя адмовіла.
Нагадаем, што папярэдні тэрмін зняволення Леўчанка завяршыўся сёння раніцай. Сустракаць яе прыехалі бацькі, заўзятары і вядомыя спартсмены, але ў 7.20 ім паведамілі, што Алена затрыманая яшчэ на 72 гадзіны па іншым эпізодзе.
А 12.00 разгляд справы пачаўся ў судзе Ленінскага раёна Мінска. Некалькі разоў пасяджэнне перарывалася з-за тэхнічных непаладак. Прысуд будзе абвешчаны ў 14.30.
Алена Леўчанка — адна з лепшых баскетбалістак у гісторыі Беларусі. Яна выступала за зборную з 2001 года, двойчы гуляючы ў складзе нацыянальнай каманды на Алімпійскіх гульнях. У 2010 годзе згуляла ў фінале жаночай НБА і была прызнана лепшай цэнтравой чэмпіянату свету.
Зараз Леўчанка падтрымлівае рух спартсменаў супраць гвалту і фальсіфікацый на выбарах.
Дапоўнена: Алене Леўчанка прысуджаны штраф у памеры 30 базавых. Яе павінны вызваліць з Акрэсціна.
Паводле sport.tut.by