Новы антырэкорд: у Беларусі зафіксавалі 1998 новых выпадкаў COVID-19 за суткі

У Беларусі за мінулыя суткі зарэгістраваныя 1998 пацыентаў з каронавірусам, паведамляе прэс-служба Міністэрства аховы здароўя.

Гэта рэкордная колькасць захварэлых за суткі. Папярэдні антырэкорд быў зафіксаваны 24 верасня і склаў 1994 новых выпадкі. З пачатку пандэміі выяўлена 542 077 выпадкаў захворвання.

З учорашняга дня выпісаныя 1 338 пацыентаў. Ачунялі 521 362 чалавекі з дыягнаставаным раней COVID-19.

За ўвесь перыяд распаўсюджання інфекцыі ў краіне памерлі 4174 пацыенты з каронавірусам. За суткі памерлі 15 чалавек.

Усяго праведзена 8 574 094 тэсты, з іх з учорашняга дня выканана 35 647 даследаванняў.