«Пакеты з трупамі ляжалі на падлозе і сталах». Як хаваюць памерлых ад COVID-19

«Свабода» сабрала некалькі сведчанняў людзей, якія сутыкнуліся з сітуацыяй наўпрост.

Пад канец кастрычніка адна з жыхарак Гомеля пахавала маці, якая памерла ад наступстваў каронавірусу. Яна заўважыла ў сваім допісе, што не варта верыць афіцыйнай статыстыцы памерлых. Па яе назіраннях, да моргаў стаяць чэргі з аўтамабіляў рытуальных бюро, а труну асобна не купіць — толькі з поўным комплексам паслуг.

«Маці памерла вечарам у шпіталі. У гэты ж вечар мы звязаліся з рытуальным бюро, каб дамовіцца на заўтра на пахаванне. Там адказалі, што не факт, што атрымаецца заўтра пахаваць. Гледзячы ў які час аддадуць цела, бо моргі перапоўненыя. Калі днём — то вечарам хаваць не будзем, — так нам сказалі», — расказала жыхарка Гомеля.

Калі яна прыйшла ў морг шпіталя, то ўбачыла, што «пакеты з трупамі ляжалі на падлозе і сталах».

«Страшна глядзець... Не ведаю, можа, у іх практыка такая — складаць вось так проста. У моргу сказалі, што цела аддадуць у 13.00. Да нас была машына з рытуальнага бюро па нябожчыка. І пасля нас. Прыкладна раз на трыццаць хвілін з моргу рытуальнае бюро забірала нябожчыка», — дадала жанчына.

Маці яна пахавала не ў Гомелі, а на яе радзіме ў правінцыі. Таму не ведае, якая абстаноўка на гомельскіх могілках.

Пра сітуацыю ў Гомелі журналісты запыталіся ў кіраўніка аднаго з рытуальных бюро, які пагадзіўся пагаварыць на ўмовах ананімнасці. Ён пацвердзіў, што пахаванняў у горадзе цяпер адбываецца больш, чым звычайна. І ля моргаў часам сапраўды ўтвараюцца чэргі з катафалкаў.

«Сітуацыя, якую вы апісалі, назіраецца ў нашым горадзе на працягу апошніх трох тыдняў. Падобная сітуацыя была і ўвосень мінулага году. Адзінае, што экскаватары працуюць толькі на новых участках Стукачоўскіх могілак. Спадзяёмся, што, як і летась, сітуацыя нармалізуецца да канца лістапада», — патлумачыў кіраўнік бюро.

Супрацоўніца дзяржаўнага бюро рытуальных паслуг у Гомелі зазначыла, што «сітуацыя, калі нельга купіць асобна толькі труну, склалася ў прыватных рытуальных бюро. У нас можна купіць асобна труну ці вянок — каму што трэба».

У Гомелі рытуальныя паслугі аказваюць каля 30 прыватных бюро. Афіцыйная статыстыка памерлых ад каронавірусу асобна для горада і вобласці не публікуецца.