Польскія паліцэйскія прыехалі ў Літву, каб дапамагаць у ахове мяжы з Беларуссю

У Літву прыбылі больш за 50 польскіх паліцэйскіх. Яны будуць дапамагаць літоўскім памежнікам у ахове мяжы з Беларуссю і прадухіленні незаконнай міграцыі, паведамілі ў МУС Літвы.

Мяркуецца, што гэтыя афіцэры прапрацуюць у Літве месяц, а затым іх заменяць калегі.

«Я не сумняюся, што разам мы пераадолеем гэты выклік і абаронім Літву і Польшчу ад нападаў, арганізаваных беларускім рэжымам», — сказала міністарка ўнутраных спраў Агне Білатайтэ, вітаючы калег.

Афіцэры прыбылі ў суправаджэнні міністра ўнутраных спраў Польшчы Марыюша Каміньскага. Ён, у сваю чаргу, заявіў, што не сумняецца ў афіцэрах, у тым, што яны будуць прафесійна выконваць свае абавязкі і дапамогуць забяспечыць ахову літоўскай мяжы.

З пачатку года літоўска-беларускую мяжу нелегальна перасеклі 4 146 мігрантаў, нагадалі ў МУС краіны. Праз нелегальную міграцыю Літва вымушаная была абвясціць на мяжы надзвычайную сітуацыю.

Паток мігрантаў прыкметна павялічыўся пасля таго, як у дачыненні да Беларусі ўвялі новы пакет санкцый праз інцыдэнт з самалётам «Ryanair». Аляксандр Лукашэнка заявіў, што мяняе падыходы да стрымлівання нелегальнай міграцыі і кантрабанды. Пасля таго, як Літва, Польшча і Латвія перасталі прымаць мігрантаў, Лукашэнка распарадзіўся не пускаць іх і назад у Беларусь. Людзі вымушаныя бадзяцца на мяжы паміж дзвюма краінамі.

У ЕС лічаць, што беларускія ўлады датычныя да арганізацыі крызісу на мяжы.

Паводле «Еўрарадыё».