Улады Беластока перадалі беларускім журналістам памяшканне для працы

Горад Беласток перадаў памяшканне па адрасе: вуліца Сянкевіча, дом 44 — для адкрыцця беларускага цэнтра-каворкінгу, дзе любы журналіст зможа папрацаваць. Гаворка ідзе найперш пра рэпарцёраў, якія пакінулі радзіму з прычыны пераследу, адзначае БАЖ. Гэта рэдакцыя Hrodna.Life і журналісты партала «Магілёўскі рэгіён».

Падчас урачыстай прэс-канферэнцыі і перадачы ключоў прысутных беларусаў прывітаў віцэ-прэзідэнт Беластока Збігнеў Нікітаровіч:

— Беласток — асабліва добрае месца для такога роду падтрымкі і дзейнасці. Мы — суседзі, і Гродна — нам блізкі горад. Я веру, што гэта таксама інвестыцыя мясцовага самакіравання Беластока. І ў цэлым добрае дэмакратычнае суседства.

Паводле слоў Збігнева Нікітаровіча, памяшканне плошчай 70 кв.м. ад горада было перададзена беларускім журналістам па мінімальнай арэнднай стаўцы: 2 злотыя за квадратны метр.