У Германіі затрымалі каля 250 мігрантаў, якія трапілі ў ЕС праз Беларусь

Каля 250 нелегальных мігрантаў, якія трапілі ў Германію праз Беларусь, затрымалі з пачатку года нямецкія паліцэйскія, паведамляе газета «Die Welt» са спасылкай на аналітычны даклад мясцовых органаў бяспекі па нелегальнай міграцыі. Усе затрыманыя — выхадцы з Ірака.

Пры гэтым аўтары дакумента адзначаюць, што колькасць нелегальных мігрантаў, якія заехалі ў ЕС з Беларусі, расце. Аналіз таксама паказаў, што арганізатары незаконнай міграцыі просяць бежанцаў запісаць відэа са словамі «Я ў Германіі», адзначае «Еўрарадыё».

«Мяркуецца, што гэта будзе "рэкламай" кантрабанды, а таксама можа вызваліць ад рэштак аплаты за паслугі кантрабандыстаў», — гаворыцца ў дакуменце.

Выданне распавядае пра групу іракцаў, якіх паліцыя выявіла 17 жніўня ў Саксоніі. Гэта былі «агулам 15 іракскіх грамадзян без дакументаў». У паліцыю пра іх паведамілі мясцовыя жыхары.

Першыя расследаванні, праведзеныя нямецкімі паліцэйскімі, паказалі, што «ўсе людзі спачатку прыляцелі ў Мінск рэгулярнымі рэйсамі, а затым былі дастаўленыя ў Германію на легкавых і грузавых аўтамабілях». Затым усе яны папрасілі прытулку.

Пры гэтым некаторыя людзі распавядалі падчас допытаў, што на мяжу ў Беларусі іх «суправаджалі людзі ў чорным, некаторыя з іх былі ўзброеныя і ў масках. На транспартных сродках, на якіх іх везлі, не было нумарных знакаў, а вокны былі прыцемненыя».

Выданне падрабязна распавядае пра сітуацыю, якая склалася на мяжы Літвы і Польшчы з Беларуссю, пра вялікі паток мігрантаў і пра тое, што да крызісу можа быць датычны рэжым Аляксандра Лукашэнкі.