Польшча прапанавала гуманітарную дапамогу бежанцам на тэрыторыі Беларусі

Улады Польшчы прапанавалі Беларусі аказаць гуманітарную дапамогу групе імігрантаў на польска-беларускай мяжы. Гэтая заява апублікавана на афіцыйным сайце МЗС Польшчы.

У дыпламатычнай ноце гаворыцца пра гатоўнасць Польшчы аказаць на месцы матэрыяльную дапамогу.
«Польшча звярнулася з запытам да беларускага боку аб бягучых патрэбах, заявіўшы пра гатоўнасць аказаць прамую дапамогу, якая ўключае, у прыватнасці, палаткі, ложкі, спальныя мяшкі, коўдры, піжамы, пасцельныя прыналежнасці і сродкі асабістай гігіены, а таксама пры неабходнасці прадукты харчавання і лекі», — падкрэсліваецца ў паведамленні.
На польска-беларускай мяжы недалёка ад Уснаж-Гурны ў Падляскім ваяводстве каля 30 бежанцаў з Афганістана знаходзяцца пад аховай сілавых структур Польшчы і Беларусі ўжо 14 дзён. Памежнікі перашкодзілі імігрантам нелегальна перасекчы мяжу Польшчы з боку Беларусі.