Праціўнікі акумулятарнага завода выйшлі на агітацыйны пікет

У Брэсце праціўнікі акумулятарнага завода 3 лістапада ўзялі ўдзел у перадвыбарчым агітацыйным пікеце кандыдатаў у дэпутаты ад Беларускай сацыял-дэмакратычнай партыі (Грамада) Ігара Маслоўскага і Ганны Канюс.

Старшыня Брэсцкай абласной арганізацыі сацыял-дэмакратаў Ігар Маслоўскі балатуецца ў Палату прадстаўнікоў па Брэсцкай-Памежнай акрузе № 4, кіраўнік Брэсцкай гарадской структуры БСДП (Грамада) Ганна Канюс — па Брэсцкай-Усходняй выбарчай акрузе № 3.
Усяго ў пікеце, па дадзеных праваабаронцы Уладзіміра Вялічкіна, удзельнічае каля 150 чалавек, паведамляе БелаПАН.

Як паведаміла актывістка Алена Макарэвіч, яны сёння вырашылі не збірацца на плошчы Леніна, як рабілі гэта кожную нядзелю з 25 лютага 2018 года, а прыняць удзел у пікеце, каб публічна выказаць свой пратэст супраць акумулятарнага завода.
Па словах Макарэвіч, ва ўсіх непровластных кандыдатаў, у тым ліку Маслоўскага і Канюс, адным з пунктаў праграмы з'яўляецца закрыццё завода.
Пікетаванне праходзіць на пляцоўцы каля гандлёвага цэнтра насупраць Палаца культуры прафсаюзаў. У гэты ж час на пляцоўцы каля ДК прафсаюзаў гарадскі аддзел МНС праводзіць мерапрыемства ў рамках рэспубліканскай акцыі «За бяспеку разам».

Заяўленая арганізатарамі тэматыка пікету — «змяняльнасць улады, справядлівая зарплата, якасная і даступная ахова здароўя, забарона будаўніцтва акумулятарнага завода пад Брэстам». Усё гэта з'яўляецца часткай праграм згаданых кандыдатаў у дэпутаты.
Удзельнікі пікету скандуюць «Не заводу!». Яны разгарнулі бел-чырвона-белыя сцягі, сцяг з гербам «Пагоня», сцягі БСДП (Грамада). Таксама некаторыя ўдзельнікі пікету трымаюць жоўтыя паветраныя шары з надпісам «Жыць» — гэта слова з'яўляецца дэвізам грамадскай кампаніі супраць будаўніцтва акумулятарнага завода.
naviny.by