Пракуратура Стэфановічу: «Рашэння аб увядзенні каменданцкага часу не прымалася»
Аказваецца, Глыбоцкім райвыканкамам афіцыйнае "рашэнне аб увядзенні каменданцкага часу не прымалася"...
Пракуратура Глыбоцкага раёна
разглядзела заяву юрыста ПЦ “Вясна” Валянціна Стэфановіча аб парушэнні
службовымі асобамі Глыбоцкага райвыканкама заканадаўства ў частцы незаконнага
ўвядзення на тэрыторыі раёна з 14 да 20 верасня 2017 года каменданцкага часу.
“Праверкай па звароце ўстаноўлена, што Глыбоцкім райвыканкамам афіцыйнае рашэнне аб увядзенні каменданцкага часу не прымалася, а размяшчэнне 14 верасня на сайце райвыканкама адпаведнай інфармацыі насіла толькі навучальны характар у межах вучэнняў па тэрытарыяльнай абароне і якіх бы там абмежаванняў правоў і свабод грамадзян не цягнула”, — пазначыў у адказе да праваабаронцы пракурор Глыбоцкага раёна Ігар Валынец.
Ён вырашыў, што падстаў для прыняцця па звароце Валянціна Стэфановіча мераў пракурорскага рэагавання няма.
Праваабаронца адзначае, што ўсё ж такі грамадзяне былі праінфармаваныя пра каменданцкую гадзіну не толькі праз сайт Глыбоцкага райвыканкама, але і праз абвесткі, якія былі развешаныя ў горадзе.
"Я, як грамадзянін, калі б прачытаў такую абвестку, палічыў бы, што мне прадпісана дзейнічаць так, як было там ўказана: не выходзіць на вуліцу без неабходнасці, не перамяшчацца паміж населенымі пунктамі без дакументаў і г.д.
Акрамя таго, невядома, як бы разгортваліся падзеі, калі б журналісты не звярнулі ўвагу на такое рашэнне і выканкам не адказаў, што ўсё гэта “панарошку”. Атрымоўваецца, што такім чынам службовыя асобы маглі б правесці і іншыя “вучэнні”, да прыкладу зрабіць мабілізацыю ўсіх ваенаабавязаных", — сказаў Валянцін Стэфановіч.
Нагадаем, 14 верасня сродкі масавай інфармацыі Беларусі абляцела навіна аб тым, што ў Глыбокім уведзена каменданцкая гадзіна з-за вучэнняў "Захад-2017", спасылаючыся на паведамленне на сайце Глыбоцкага райвыканкама. Пасля з’яўлення інфармацыі пра гэта ў СМІ, у хуткім часе паведамленне было выдалена са старонкі сайту.