«Сітуацыя выглядае дрэнна». У Эстоніі будуць вырашаць пытанне з імпартам беларускіх нафтапрадуктаў

Прэм'ер-міністр Эстоніі Кая Калас заявіла, што кампетэнтныя органы павінны разабрацца ў сітуацыі вакол таго, што Беларусь, якая патрапіла пад санкцыі ЕС, дагэтуль выкарыстоўвае Эстонію для экспарту рэкордна буйных аб'ёмаў сваіх нафтапрадуктаў, піша postimees.ee.

Летась Эстонія імпартавала беларускіх нафтапрадуктаў амаль у тры разы больш, чым годам раней. Пры гэтым у Эстонію была перанакіраваная траціна беларускай нафты, якая раней паступала ў латвійскія парты.

Прэм'ер-міністр Кая Калас пракаментавала гэтую навіну наступным чынам:

— У пытанні беларускіх санкцый дзяржаве прад'явілі сур'ёзныя папрокі. Сітуацыя выглядае дрэнна, і я стаўлюся да яе вельмі сур'ёзна. Прынцыповая знешняя палітыка павінна выяўляцца і ў яе рэалізацыі ўнутры краіны — калі мы дамовіліся аб санкцыях, мы павінны іх выконваць, а калі ёсць прабелы, то іх трэба ліквідаваць. У адваротным выпадку мы знізім уласны міжнародны аўтарытэт і права выказвацца. Падрабязна разбірацца ў дэталях павінны як Міністэрства замежных спраў, так і Міністэрства эканомікі і камунікацый, а таксама Падаткова-мытны дэпартамент. Кампетэнтныя органы павінны ацаніць, ці абыходзяцца санкцыі зламысна або адбываецца злоўжыванне дзіркамі ў законе. Раніцай я патэлефанавала міністру замежных спраў Эве-Марыі Ліймэтс і папрасіла яе вынесці гэтае пытанне на пасяджэнне ўрада. Мэта палягае ў тым, каб як мага хутчэй разабрацца ў сітуацыі і вызначыць, ці былі парушаныя санкцыі.

Нагадаем, што з 1 лютага Літва прыпыніла транзіт калійных угнаенняў праз порт у Клайпедзе. У снежні ад транспартавання калія адмовілася Латвія.