Сяргей Гаранін: На Акрэсціна забіваюць айца Уладзіслава Багамольнікава

Навуковец Сяргей Гаранін, які адседзеў 10 сутак за кратамі, напісаў у сваім фэйсбуку пра ўмовы ўтрымання на Акрэсціна і пра айца Уладзіслава Багамольнікава, якому далі новыя «суткі».

Сяргей Гаранін. Фота Дзмітрыя Дзмітрыева

Сяргей Гаранін. Фота Дзмітрыя Дзмітрыева


— Учора майму былому сукамернiку, айцу Уладзіславу Багамольнiкаву, далі сёмы тэрмін на Акрэсціна, і, па маіх падліках, сядзіць ён ужо 89-я соднi, — піша Сяргей Гаранін. — Пра гэта я даведаўся сёння днём i напісаў два каментары.

Сутнасць жа іх была ў наступным.

Акрэсціна — гэта не турма, а ЦВП. Таму ўмовы там надзвычай жорсткія, нашмат горшыя за ўсе іншыя беларускія вязніцы і зоны. Гэта кшталту гаўптвахтаў былой савецкай арміі. Але ж на Акрэсціна доўга і не сядзяць! Чалавек такіх ўмоў фізічна не вытрымлiвае.

Ён памрэ. Так, я ведаю пра «каруселі». І пра тое, што на Акрэсціна сядзяць шмат-шмат тыдняў, таксама ведаю. І бачыў такіх. Але ТРЫ МЕСЯЦЫ... Да таго ж, стан здароўя айца Уладзіслава пагоршыўся. Нават калі я вызваляўся і ён паціснуў мне руку, то рука ў яго была нядужая, пальцы тонкія, усе костачкі ў іх чуваць...

Дык гэта калі было!!! А цяпер?! Да таго ж, ён і галадоўку трымаў...

Уладзіслаў чалавек мужны і трымаецца ён з годнасцю і моцна. Падтрымлівае іншых. Зрабіць яму ЯНЫ нічога не могуць. Таксама прад'явіць яму па факце нічога не можна. Ну, адслужыў ён ліцію па Раману Бандарэнку — дык што? Гэта пастарскі абавязак...

Таму... ЯНЫ ЯГО ЗАБІВАЮЦЬ. Фізічна.

Я скеміў гэта і напісаў. Я закрычаў ад болю і жаху!

Так у іншым месцы забіваюць яны не першы месяц Міколу Статкевіча... Так часам рабілася ў сярэднявечнай Візантыі — ужо вы мне паверце, я ведаю! Чалавека садзiлі ў вязніцу, трымалі ў невыносных умовах (хаця трохі кармілі), потым невылечна хворага выпускалі, а праз некалькі дзён ён паміраў. Так бы мовіць, «сам». І дзяржава тут ні пры чым, бо «умирают же люди. Вон, и Макей... того... Не согласовав даже такого своего поступка со всеми заинтересованными...»


Праваслаўнага свяшчэнніка айца Уладзіслава Багамольнiкава забіваюць на Акрэсціна. I я гэтаму сведка! Чуеце? — Сведка!

...Лёгачныя інфекцыі, на якія хварэе зараз Уладзіслаў, не вылечваюцца на раз-два. Я перхаю і праз месяц пасля вызвалення. Урач на Акрэсціна не аглядае пацыентаў, а размаўляе з імі праз прыадчыненую кармушку. На Акрэсціна няма шпіталя. Працэс можа прыняць неабарачальны характар. Пра гэта трэба казаць, пісаць, крычаць!

Праваслаўнага свяшчэнніка айца Уладзіслава Багамольнiкава забіваюць на Акрэсціна!

Хочаце ведаць больш? Сачыце за нашымі публікацыямі ў Telegram і Facebook!

Больш цікавага на «Новым Часе»: