«Стан у яе прыгнечаны». Маці затрыманай у Мінску расіянкі распавяла, што ад яе дачкі не прыходзяць лісты

Да сваякоў расіянкі Сафіі Сапега, якую затрымалі ў Мінску разам з экс-галоўрэдам беларускага Telegram-канала «Nexta» Раманам Пратасевічам, не даходзяць яе лісты, стан у яе прыгнечаны. Пра гэта распавяла «МБХ медыя» маці Сапега Ганна Дудзіч.

«Ад Соф'і лістоў няма. Адвакату яна перадала, што напісала тры ці чатыры лісты. Мае лісты яна атрымлівае, а яе лістоў я не атрымліваю. Абсалютны мінімум інфармацыі, і гэты мінімум, вядома, нас мучыць яшчэ больш, чым усё астатняе», — адзначыла яна.
Дудзіч распавяла, што ў апошні раз адвакат змог трапіць да Сапега ў 4 чэрвеня. «Стан яе прыгнечаны, разгубленая, перадалі ад яе сякія-такія чыста бытавыя просьбы. Ну, і сёння ўжо аўторак, і з таго часу ніякіх вестак, нічога. Консул да яе не трапіў да гэтага часу, быў толькі адзін раз за ўвесь гэты час. Не ведаю, па якіх прычынах», — сказала яна.