Шматдзетнаму бацьку прысудзілі 1,5 года калоніі за абразу Лукашэнкі

24 лістапада суд Маладзечна і Маладзечанскага раёна вынес асудзіў 34-гадовага Андрэя Юркова да 1,5 гадоў пазбаўлення волі ў калоніі строгага рэжыму за абразу Лукашэнкі паводле арт.368 Крымінальнага кодэкса. Ён знаходзіўся пад вартай з 8 лістапада 2021 года, піша «Вясна».

Андрэй Юркоў — грамадзянін Беларусі, але нарадзіўся ў расійскім Магнітагорску. Мае траіх дзяцей.

Справу разгледзеў суддзя Дзяніс Барэйка. Бок абвінавачання падтрымала памочніца пракурора Маладзечанскага раёна Юлія Жук. Паводле версіі абвінавачання, 8 красавіка 2021 года Юркоў у нецвярозым стане ненарматыўна выказаўся ў бок Лукашэнкі ў Маладзечанскім РАУСе.

Юркоў цалкам прызнаў віну. Ён патлумачыў, што на працягу дня піў віно, быў моцна п'яны, вырашыў перайсці праз плынь машын у непаложаным месцы на вул. Міра, дзе яго спынілі ДАІ. Ён не памятае канкрэтна, што сказаў, як і прычыну, чаму гэта зрабіў. У мітынгах і чатах ніколі не ўдзельнічаў, таму прасіў, каб яго памілавалі.

Сведка — міліцыянер Варанкоў, які затрымліваў Юркова, распавёў, што абвінавачаны сам бег да іх, калі перабягаў дарогу, і прасіў яго затрымаць. Калі яго прывезлі ў аддзел, ён выказваўся і ў адрас Лукашэнкі, і ў адрас супрацоўнікаў. Яго спрабавалі супакоіць, але ўсё было безвынікова. Варанкоў на паперцы напісаў выразы, якія абвінавачаны гаварыў у аддзеле. Другі сведка — міліцыянт Тамашкевіч — адсутнічаў пры абразах Лукашэнкі, але сказаў, што, калі калега яму ўсё даклаў, яны разам глядзелі камеры назірання. Яшчэ адна сведка — пенсіянерка Талай — была ў РАУСе і напісала на паперцы, як выказваўся абвінавачаны. Аднак яна заўважыла, што, хаця ён і лаяўся, гэта не было адрасавана ў адрас каго-небудзь, хаця падчас папярэдняга следства паказвала, што лаянка была менавіта ў бок Лукашэнкі.

Пракурорка запрасіла 1,5 года пазбаўлення волі ў калоніі строгага рэжыму. Менавіта такое пакаранне вынес суддзя.