TikTok-блогера асудзілі на два гады калоніі за абразу Лукашэнкі

Палітзняволенаму TikTok-блогеру Андрэю Бяляўскаму сёння, 22 жніўня, прысудзілі два гады калоніі за абразу Лукашэнкі, паведамляюць праваабаронцы.

Суд над 45-гадовым TikTok-блогерам з Бабруйска Андрэем Бяляўскім пачаўся сёння раніцай, а ўжо пасля абеду быў вынесены прысуд. Яго справу паводле артыкула 368 Крымінальнага кодэкса (абраза Лукашэнкі) у закрытым рэжыме разглядаў суддзя Антон Дудаль.

Андрэя Бяляўскага затрымалі 28 красавіка наўпрост на працы — у ягонай уласнай роварнай краме «Веласпортмайстар».

Разам з Бяляўскім забралі і яго непаўналетняга сына. Потым сына адпусцілі — аддалі бабулі з дзядулем.

Пасля затрымання супрацоўнкі ГУБАЗіКа захапілі акаўнт Бяляўскага ў TikTok.

Андрэя можна падтрымаць грашовымі пераводамі, пасылкамі, бандэролькамі і тэлеграмамі: СІЗА-5, 213826, Бабруйск, 1-ы Пераезны завулак, 10, Андрэй Мікалаевіч Бяляўскі.