У Беларусі ратавальнікам выдадуць зброю

Лукашэнка заявіў, што частку супрацоўнікаў Міністэрства па надзвычайных сітуацыях узброяць.

"Усе супрацоўнікі МНС, асабліва пры цяперашнім міністры, хочуць быць сілавым блокам. У сілавы блок уваходзіць, так? Сілавікі — мы так іх і лічым", — сказаў Лукашэнка на нарадзе ў панядзелак, відэафрагмент з якой апублікаваў тэлеграм-канал "Пул першага".
Паводле слоў Лукашэнкі, каб "быць сілавіком, трэба цудоўна валодаць зброяй". "Маё распараджэнне было каб мы вызначылі ў МНС, якую частку мы будзем узбройваць", — сказаў ён.
"Хацелася б пачуць, наколькі мы рушылі наперад у гэтым плане, каб МНС стала сілавым блокам па-сапраўднаму, колькі людзей у нас будзе валодаць зброяй не горш, чым у войску і міліцыі", — цытуе  Лукашэнку Белта.
"Калі адбудзецца нейкі канфлікт, не дай Бог вайна, у нас што, у МНС моцныя надзейныя супрацоўнікі будуць у баку? Не. Яны не толькі пажар будуць тушыць", — сказаў кіраўнік.
Паводле яго, з аднаго боку, супрацоўнікі МНС будуць ратавальнікамі, а іх другая функцыя як узброеных людзей — устаць на абарону краіны. "А для гэтага трэба валодаць зброяй. Якой? Пісталеты, аўтаматы, кулямёты, гранатамёты, ці мы іх будзем узбройваць яшчэ і нейкай тэхнікай? Думаю, так. І гэты актыў будзе, сур'ёзны актыў, і дапамога для нашага войска на выпадак, калі раптам".
Ён выказаў меркаванне, што і ў мірны час, мадэрнізуючы МНС, знойдзецца для іх работа як узброеных людзей. "Гэта вельмі важна пры рэфармаванні. А не тое, што мы там клетачкі накрэслім: гэтага чалавека туды, гэтага - сюды. Гэта само сабой, але павінна быць істотная мадэрнізацыя", - дадаў Лукашэнка.