У Магілёве ў журналістаў «Белсату» міліцыя забрала тэхніку

У магілёўскіх журналістаў тэлеканалу «Белсат» Аліны Скрабуновай і Аляксандра Сідарэўскага супрацоўнікі Ленінскага аддзелу міліцыі забралі кампутары, тэлефоны, фота- і відэатэхніку. Іх вінавацяць у супрацоўніцтве з замежным медыя без акрэдытацыі, перадае Радыё Свабода.

Агляд кватэры і машыны праводзілі паводле пастановы пракурора. Як кажуць журналісты, вобшукам кіраваў супрацоўнік Ленінскага аддзелу міліцыі Башарымаў. Ніякіх папераў, якія ўзаконьваюць выманне тэхнікі, міліцыянты журналістам не пакінулі.

Аліна Скрабунова
Скрабунову і Сідарэўскага затрымалі ў другой палове дня ў цэнтры горада, калі яны ехалі на разгляд крымінальнай справы супраць былой чыноўніцы Ірыны Жабаравай. Тры гадзіны іх пратрымалі ў міліцыі без складання пратаколу. Затым Скрабунову павезлі дамоў і там учынілі ператрус.

Аляксандр Сідарэўскі
Нагодай для затрымання і ператрусу стаў рапарт пра тое, што журналісты 21 студзеня былі ў будынку Ленінскага суда Магілёва і зрабілі сюжэт пра працэс над магілёўцам, які раскідаў самарэзы ля будынкаў сілавых структураў.
Журналістам выдалі позву для складання пратаколаў на 19 лютага.