У мінскіх офісах Белсату адбыліся ператрусы (абнаўляецца, фота, відэа)

Паводле заявы ГУУС Мінгарвыканкаму, ператрусы адбываюцца праз заяву ад праваўладальніка гандлёвай маркі «BELSAT».

Паводле заявы ГУУС Мінгарвыканкаму, ператрусы ў мінскіх офісах тэлеканалу «Белсат» адбываюцца праз заяву ад праваўладальніка гандлёвай маркі «BELSAT».
«У выніку праведзеных праверачных мерапрыемстваў супрацоўнікамі міліцыі выяўленае кола асобаў, якія выкарыстоўваюць ўказаны таварны знак у парушэнне артыкулу 9.21 КаАП Рэспублікі Беларусь (парушэнне аўтарскага права, сумежных правоў і права прамысловай уласнасці). Для правядзення неабходных працэсуальных дзеянняў па месцах іх знаходжання праведзеная канфіскацыя аўдыё- і відэатэхнікі, кампутарнага абсталявання», — гаворыцца ў паведамленні ГУУС.
Вярхоўны Суд Беларусі забараніў назву тэлеканала «Белсат» у 2014 годзе — Telewizja Polska прайграла суд уладальніку беларускай фірмы «БЕЛСАТплюс» Андрэю Белякову, які зарэгістраваў адпаведны гандлёвы знак у 2001 годзе, хоць спачатку калегія Вярхоўнага суду адхіляла заяву Белякова.
Кампанію Telewizja Polska S.A. абавязалі спыніць выкарыстанне гандлёвага знаку «Белсат» пры трансляцыі на тэрыторыі Рэспублікі Беларусь і адмовіцца ад яго выкарыстання на інтэрнэт-сайце тэлеканалу, які таксама даступны на тэрыторыі Беларусі.
Андрэй Белякоў — дырэктар ПГУП "БЕЛСАТплюс", якое ў 2014 годзе выйграла ў тэлеканала "Белсат" суд за таварны знак, не мае дачынення да сённяшніх ператрусаў. Пра гэта прадпрымальнік распавёў у тэлефоннай размове з Еўрарадыё:
"Як будуць грошы — буду нешта рабіць. А цяпер пытанне "вісіць" па віне польскага боку, праз іх сквапнасць. Я столькі грошай выдаткаваў... На выкананне даслаў [дакументы] варшаўскаму акруговаму суду. Але нічога не атрымаў наўзамен, ні капейкі. Грошы згубіў. Вядома, калі будзе магчымасць — я буду дамагацца сваіх грошай", — кажа Андрэй Белякоў.
13:35 У інтэрв’ю svaboda.org  дырэктар тэлеканалу “Белсат” паведаміла:
Гэта выразная атака на Белсат. Я так разумею, што гэта своесаблівы падарунак на нашае 10-годзьдзе.
13:20 Да Алеся едзе праваабаронца Алена Красоўская-Каспяровіч.
12:58 У РУУС Першамайскага раену Менска паведамілі, што журналіста Любенчука ў іх няма, але інфармацыю можна ўдакладняць па тэлефоне 80172800202. Чакаем на навіны пра нашага аператара цягам 3 гадзінаў.Аператар Алесь Любянчук затрыманы і цяпер знаходзіцца ў Першамайскім РУУС.



11:55 Журналісты розных выданняў, прадстаўнікі БАЖ сабраліся каля офіса «Белсату» на вуліцы Кастрычніцкай. Невядома, што адбываецца ў памяшканні. Каля пад’езду знаходзяцца міліцыянты, кажуць, што праводзіцца следчы эксперымент.
«Пакуль што мы бачым кропкавыя рэпрэсіі ў дачыненні да «Белсату». Я думаю, што гэта з-за онлайн-трансляцый, якія Белсат паспяхова робіць і якія дазвалюць бачыць усё ў напроставым эфіры», кажа Барыс Гарэцкі, прэсавы сакратар Беларускай асацыяцыі журналістаў.



10:50 Журналіст Алесь Залеўскі ўвайшоў у офіс “Белсату”. Сілавікі вынеслі усю тэхніку і нават банер з надпісам “Белсат”. Тэхніку пагрузілі у белы мікрааўтобус. Таксама бачна, што міліцыянты праглядалі працоўныя паперы журналістаў.
10:31 Кіраўнік аддзелу інфармацыйных праграмаў «Белсату» Аляксей Дзікавіцкі звязвае ператрусы з актыўным асвятленнем у эфіры і на сайце тэлеканалу акцый пратэсту супраць Дэкрэту №3 і разгону Дня Волі. «Гэта раззлавала ўлады, бо мы яшчэ маем такі рычаг і магчымасць вывесці “карцінку” на экран, а не толькі паказаць у інтэрнэце. Цяпер улады намагаюцца абмежаваць інфармацыю пра пратэсты. Першыя сімптомы гэтага мы бачылі яшчэ ў першай палове сакавіка, калі пачалі затрымліваць нашых журналістаў. “Белсат” гатовы да гэткіх дзеянняў. Навіны на нашым тэлеканале будуць выходзіць нягледзячы ні на што», – падкрэсліў Дзікавіцкі.
10:23 З белсатаўскага офісу забралі тэхніку – паведамляе журналіст Алесь Залеўскі.
У праграмны офіс каля станцыі метро “Акадэмія навук” прыйшлі міліцыянты з прадпісаннем пракуратуры.
У іншым офісе, калі туды ўварваліся міліцынты, знаходзіўся журналіст Алесь Любянчук. Цяпер ягоны тэлефон выключаны.
Журналістка Белсату спрабавала патрапіць у офіс а 9:20. У гэтіы час ля ўваходу ужо стаяў міліцыянт, які паведаміў, што на месцы адбываюцца “следчыя мерапрыемствы”. У гэты момант у офісе маглі знаходзіцца прынамсі двое супрацоўнікаў тэлеканалу. Невядома, ці дзверы міліцынятам адчынілі, ці яны іх выбілі.
Пра тое, што забралі можна прачытаць тут.
belsat.eu, svaboda.org, baj.by