«Усё ідзе ў печку!». Да Дар’і Чульцовай у калоніі не даходзяць лісты

Маці палітзняволенай журналісткі сустржэлася з дачкой і распавяла аб гэтым «Народнай Волі».

Журналісткі Кацярына Андрэева і Дар’я Чульцова былі затрыманы 15 лістапада 2020 года пасля жывога эфіру з месца разгону сілавікамі дэманстрантаў — на сімвалічнай «плошчы Перамен».

Судом Фрунзенскага раёна Мінска яны былі прызнаны вінаватымі паводле ч.1 арт. 342 Крымінальнага кодэкса («Арганізацыя групавых дзеянняў, якія груба парушаюць парадак і звязаны з яўным непадпарадкаваннем патрабаванням прадстаўнікоў улады, што мела вынікам парушэнне працы транспарту, актыўны ўдзел у такіх дзеяннях») і прыгавораны да двух гадоў пазбаўлення волі ў калоніі агульнага рэжыму.

Зараз Дар’я Чульцова адбывае пакаранне ў жаночай калоніі №4 у Гомелі. У мінулыя выхадныя ёй дазволілі спатканне з маці.

«Усім добрым людзям дачка перадае прывітанне, — распавяла Наталля, маці Дар’і. — Самаадчуванне ў яе добрае, выглядае гэтаксама. Стала зусім дарослай.

Да вызвалення засталіся чатыры месяцы, і ўсе мы разумеем, што яны будуць самымі складанымі.

Даша ў калоніі шмат чытае, зараз збіраецца перачытаць «Майстар і Маргарыта» Булгакава.

А вось лісты дачка не атрымлівае зусім. Усё ідзе ў печку!»