Ужо і ў Расіі. Кантрабандныя беларускія цыгарэты затрымалі на Пскоўшчыне

Пскоўскія мытнікі выявілі аўтамабіль з «падвойным» грузавым адсекам. У выніку быў спынены ўвоз з Беларусі ў Расію немаркіраванай тытунёвай прадукцыі беларускай вытворчасці на агульную суму звыш 120 тысяч долараў.

На тэрыторыі стацыянарнага пункта мытнага кантролю «Далосцы» ў Себежскім раёне супрацоўнікі мытні ў рамках кантролю за ўвозам і абаротам тавараў спынілі грузавы транспартны сродак з паўпрычэпам, гаворыцца ў афіцыйным паведамленні. З прад'яўленых кіроўцам дакументаў вынікала, што аўтамабіль заязджаў з Беларусі парожнім.

— Пры правядзенні праверачных мерапрыемстваў у пярэдняй частцы грузавога адсека была выяўленая перагародка, якая імітуе вонкавую сценку паўпрычэпа. Пры выкрыцці грузавога аддзялення за фальшывай сценкай выяўлена 340 скрынь з цыгарэтамі беларускай вытворчасці, — распавёў прадстаўнік Пскоўскай мытні Альберт Скосыраў.

Арыенціровачны кошт партыі тытунёвых вырабаў без акцызных марак Расійскай Федэрацыі і маркіроўкі сродкамі ідэнтыфікацыі перавышае 120 тысяч долараў.

170 тысяч пачкаў беларускіх цыгарэт канфіскаваныя і перададзеныя тэрытарыяльнаму органу МУС Расіі для прыняцця мер у рамках наяўных паўнамоцтваў.