Вакцына «Эўпента», ад якой памерла немаўля, у Беларусі не зарэгістраваная, — Цэнтр экспертыз і выпрабаванняў

Начальніца ўпраўлення лекавых сродкаў Цэнтра экспертыз і выпрабаванняў у ахове здароўя Таццяна Шамсутдзінава паведаміла Свабодзе, што вакцына «Эўпента» не занесена ў Рэестр лекавых сродкаў Беларусі.

РУП «Цэнтр экспертыз і выпрабаванняў у ахове здароўя» падпарадкавана Міністэрству аховы здароўя.
Пасля публікацыі другой часткі расследавання інтэрнэт-выдання «Ежедневник» «Карупцыя Міністэрства аховы здароўя: дзеці грашам не перашкода», у якім сцвярджаецца, што вакцына «Эўпента» ў Беларусі не была зарэгістраваная, само Міністэрства аховы здароўя надалей маўчыць.
У панядзелак кіраўніцтва і прэс-служба міністэрства сустракалі еўракамісара, у аўторак — міністра аховы здароўя Астраханскай вобласці Расіі.
Свабодзе ўдалося задаць пытанне пра вакцыну начальніцы ўпраўлення лекавых сродкаў РУП «Цэнтр экспертыз і выпрабаванняў у ахове здароўя» Таццяне Шамсутдзінавай. Яна пацвердзіла, што вакцына «Эўпента» ў Беларусі не зарэгістраваная.
«Гэты лек не зарэгістраваны, яго ў Рэестры лекавых сродкаў няма. На сайтах і Цэнтра экспертызў і выпрабаванняў, і Міністэрства аховы здароўя ёсць рэестр лекавых сродкаў, які працуе ў рэжыме онлайн, можна спраўдзіць. Сродак не зарэгістраваны».
На пытанне Свабоды, а як вакцына магла закупляцца ў вялікіх аб’ёмах, калі яна не зарэгістраваная, не прайшла выпрабаванні, Таццяна Шамсутдзінава адказала, што гэта пытанне не да яе.
«Наконт выпрабаванняў — гэта наагул не маё пытанне. Гэта не адносіцца да маёй кампетэнцыі. Усе пытанні — да Міністэрства аховы здароўя».

Скандал з карэйскай вакцынай у Беларусі. Што важна ведаць

13 жніўня ў Ганцавіцкім раёне двухмесячны хлопчык памёр пасля прышчэпкі, якую рабіў медыцынскі супрацоўнік з 30-гадовым досведам. 14 жніўня дзяўчынка такога ж узросту трапіла ў рэанімацыю пасля планавай прышчэпкі.
Вакцыны бароняць ад шматлікіх вірусаў. Пра некаторыя інфекцыйныя хваробы забыліся толькі таму, што ёсць прышчэпкі. Калі перастаць прышчапляцца, інфекцыі досыць хутка вяртаюцца.
Аднак у медыцыне зрэдку, кажуць некаторыя спецыялісты, здараюцца такія трагедыі, як у Ганцавічах, калі мае месца індывідуальная рэакцыя, не звязаная зь якасцю прэпарата.
На перыяд расследавання выкарыстанне ў Беларусі імунабіялягічных сродкаў «Эўпента» той серыі, прышчэпкі з якой былі ўведзеныя пацярпелым дзецям, прыпынілі. Прадстаўнікі карэйскага канцэрну, які вырабіў вакцыну, прыязджалі ў Беларусь, каб расследаваць смерць дзіцяці.
Часопіс «Ежедневник» апублікаваў расследаваньне ў дзвюх частках, у якім сцвярджае, што вакцына незарэгістраваная ў Беларусі і не праходзіла праверак у краіне. Цэнтр экспертыз і выпрабаванняў у ахове здароўя пацвердзіў гэта Свабодзе.
10% лекавых сродкаў, паводле звестак Мінздароўя, трапляюць у Беларусь без рэгістра цыі.
Мінздароўя палічыла дастатковым тое, што вакцына прайшла праверку якасці Усясветнай арганізацыяй здароўя. Аднак, згодна з беларускім заканадаўствам, гэтага не дастаткова для выкарыстання яе ў краіне ў штатаных сітуацыях.
За расследаванне наконт неправеранай вакцыны для беларускіх дзяцей пачалі збіраць подпісы — на момант публікацыі сабрана амаль паўтары тысячы.
Усё гэта адбываецца на тле карупцыйнай «справы лекараў, у якой падазраванымі ў хабарах на сотні тысяч долараў праходзяць кіраўнікі шматлікіх медыцынскіх устаноў Беларусі і чыноўнікі Міндзароўя.
Радыё Свабода