Бунт у бункеры: як Хрэнін (амаль) адкрыта пайшоў супраць Лукашэнкі
За савецкім часам, у часы Хрушчова-Брэжнева быў такі анекдот: «Ці можа слон атрымаць грыжу? — Можа, калі паспрабуе падняць сельскую гаспадарку». Цяпер Лукашэнка захацеў, каб грыжу атрымаў увесь беларускі ўрад. Але самае цікавае, што не ўвесь урад з гэтым пагадзіўся!
АІ
Сітуацыя як з анекдота, але насамрэч рэальная: 21 ліпеня на селектарнай нарадзе па пытаннях уборачнай кампаніі Лукашэнка даў прэм'ер-міністру Аляксандру Турчыну і старшыні Камітэта дзяржкантролю Васілю Герасімаву два тыдні на тое, каб «прыняць найбольш жорсткія захад па ўсіх недахопах» у сельскай гаспадарцы.
«Бардак, п'янства і крадзёж ніхто трываць не будзе!», — абвясціў Лукашэнка і заявіў, што «пра дысцыпліну я нават не хачу шырока размаўляць… павінна быць жалезнай».
То-бок, пасля больш чым 30 гадоў ва ўладзе нашага найбольш сельскагаспадарчага і звышаграрнага кіраўніка краіны, пасля мільярдаў долараў, «закапаных» у калгасы, пасля купы «рэформаў» сельскай гаспадаркі, там, аказваецца, працягваюць квітнець «бардак, п'янства і крадзёж». І Лукашэнка даў Турчыну і Герасімаву два тыдні выправіць тое, што ён сам не мог выправіць тры дзесяцігоддзі. Ну анекдот жа, праўда?
Выйсце з сітуацыі Лукашэнка прапанаваў арыгінальнае, і, пры гэтым, сімптаматычнае. «Ну чаго мы будзем пры дэфіцыце кадраў кайданкі апранаць? Папрасіце Хрэніна, даручэнне яму маё перадайце: усіх, хто не ўмее працаваць, — у армію і на паўднёвую мяжу. У лес. Там нашы хлопцы, Сілы спецыяльных аперацый, па маім загадзе знаходзяцца па ўкраінскай мяжы», — сказаў Лукашэнка.
«Тыдзень падрыхтоўкі (гранатамёт, кулямёт), і туды — у распараджэнне Сіл спецыяльных аперацый. Гэта мой загад… Любое невыкананне — у армію. Хай там служыць. У лесе будзе сядзець. Там таксама патрэбныя кадры. Няхай у перыяд уборкі там паслужыць. І чыноўнік, і той, хто не хоча працаваць», — заявіў беларускі кіраўнік.
Ну, па-першае, рытарычнае і мемнае пытанне: «А што здарылася? Проста я палітыкай не цікаўлюся». Адкуль у сельскай гаспадарцы раптам ўзнік «дэфіцыт кадраў», ды такіі, што аж Лукашэнка заклапаціўся? Спачатку ён пагардліва называе тых, хто з'ехаў, «збеглымі» і кажа, што без іх яму будзе лепш, а потым — то медыкаў не хапае, то на заводы трэба пенсіянераў набіраць, і вось ужо ў сельскай гаспадарцы кадравы голад...
І нават узбекі — не панацэя. Мы ўжо пісалі, як яны адмовіліся працаваць за беларускія заробкі, і ў выніку ім не толькі аплату паднялі, але і ўмовы працы і жытла зрабілі такімі, якія беларусам і не сніліся.
Глядзіце таксама
Вось толькі Лукашэнка зноў пачаў круціць. Як звычайна, ён спрабуе падмяніць заробак уяўным патрыятызмам. Маўляў, з прэзідэнтам Узбекістана яны дамаўляліся, што ўзбекі будуць працаваць тут, каб стварыць малако і мяса, якія будуць пастаўлены ва Узбекістан. «Да нас яны прыедуць для таго, каб стварыць мяса, малако, іншую сельгаспрадукцыю і паставіць на радзіму. Чым вышэйшая прадукцыйнасць, чым больш тавараў вырабяць, тым большая зарплата» — кажа Лукашэнка.
І дадаў, што «калі хтосьці мае намер ехаць у Беларусь, каб атрымліваць велізарныя грошы… то лепш разгледзець, напрыклад, варыянт працаўладкавання ў Расіі». І цынічна прапанаваў узбекам уладкоўвацца ў расійскую нафтаперапрацоўку — тую, якая цяпер спынілася праз удары ўкраінскіх дронаў.
Так што, верагодна, узбекі атрымаюць першы заробак — і зноў папросяцца на радзіму. А Лукашэнка скажа Мірзіёеву, што яго грамадзяне проста не хочуць працаваць на карысць Узбекістана.
Карацей, усё паводле Сэмюэля Джонсана: «Патрыятызм — апошні прытулак мярзотніка». Нават калі гэта чужы патрыятызм.
А мы вернемся да нашага.
Кіраўнік Адміністрацыі прэзідэнта Дзмітрый Круты (што дзіўна, яму, нібыта, нічога не даручалі?) заявіў пра пачатак фармавання спісаў з «нядбайных работнікаў, якія праштрафіліся, несуноў, п'яніц, гультаёў і лайдакоў». «Гэтыя людзі будуць накіроўвацца ў распараджэнне Міністэрства абароны», — заявіў Круты.
Фармат працы з такімі работнікамі будзе вызначаць міністр абароны. Гэта, паводле слоў Крутога, могуць быць ваенна-выхаваўчыя вучэнні або зборы. Прычым стан здароўя і ўзрост улічвацца не будуць.
І ведаеце, гэта прабрало нават міністра абароны Хрэніна. Ды так, што ён хутка адхрысціўся ад слоў Крутога пра тое, што непасрэдна ён, Хрэнін, «будзе вызначаць фармат працы з такімі работнікамі». Гэта па-першае.
А па-другое, у Хрэніна ўсё ж, аказваецца, ёсць мозг, а не след ад фуражкі. І гэты мозг намаляваў яму цудоўную карціну, у якой наша армія складаецца суцэльна з «нядбайных, якія праштрафіліся, несуноў, п'яніц, гультаёў і лайдакоў». А ў дадатак — старых, нямоглых і інвалідаў.
Хрэнін прыйшоў у жах, і пасля дакладу Лукашэнку заявіў: «На перавыхаванне мы нікога браць не будзем. Будзем браць для таго, каб удасканальваць баявую вывучку нашых людзей, асабліва ваеннаабавязаных».
То-бок, Хрэнін фактычна ўзбунтаваўсясупраць чарговага «геніяльнага» рашэння Лукашэнкі. Прычым, узбунтаваўся дастаткова адкрыта, каб гэта было заўважана.
Такі бунт выклікае вялікую цікавасць. Раптам у беларускага міністра абароны «з'явіліся яйкі»? Асабліва пасля таго, як вясной усе пісалі пра «чысткі ў войску» пасля лукашэнкаўскай праверкі.
Відаць, Хрэнін паглядзеў на гэтыя «чысткі» і зразумеў, што «Акела састарэў» і проста ўжо нічога не зможа зрабіць?
Ці не зможа зрабіць таму, што «дэфіцыт кадраў» цяпер і ў арміі, і іншых ваенных у беларускага дыктатара няма?
Якія матывы і высновы надалі Хрэніну такога імпэту, каб пярэчыць Лукашэнку?