Варшава "ўсур`ёз занепакоеная" чарговым затрыманнем беларускага журналіста Пачобута



Афіцыйная Варшава сур`ёзна занепакоеная чарговым затрыманнем гродзенскага журналіста Андрэя Пачобута, заявіў прэс-сакратар польскага МЗС Марцін Басацкі.

Паводле яго слоў, якія прыводзіць рэсурс gazeta.pl, консульства Польшчы ў Гродне і пасольства ў Мінску ўважліва сочаць за развіццём падзей.

"Гэты чарговы доказ таго, што ў Беларусі па-ранейшаму вельмі дрэннае становішча з правамі чалавека, у тым ліку з правамі актывістаў польскай меншасці", — заявіў Басацкі.

Пачобут, які з`яўляецца старшынёй галоўнай рады нефармальнага Саюза палякаў на Беларусі, быў затрыманы 21 чэрвеня прыкладна ў 16 гадзін у сябе дома ў Гродне ў прысутнасці сям`і.

Як паведаміла БелаПАН яго жонка Аксана, журналіст працаваў дома над чарговым артыкулам, калі з`явіліся супрацоўнікі пракуратуры, міліцыі і Следчага камітэта. У доме быў праведзены вобыск, затым Пачобута павезлі ў пракуратуру, а адтуль даставілі ў СІЗА. У дачыненні да яго распачата справа паводле ч. 2 арт. 367 КК (паклёп у дачыненні да прэзідэнта, учынены асобай, раней судзімай за паклёп ці абразу), якая прадугледжвае пакаранне ў выглядзе абмежавання ці пазбаўлення волі тэрмінам да пяці гадоў. Нагодай для крымінальнага пераследу, паводле слоў Аксаны Пачобут, сталі артыкулы журналіста на сайтах "Хартыя`97" і "Беларускі партызан" пра вынясенне смяротных прыгавораў Дзмітрыю Канавалаву і Уладзіславу Кавалёву.

Абараняць Пачобута будзе адвакат Аляксандр Бірылаў.

5 ліпеня 2011 года суд Ленінскага раёна Гродна прызнаў журналіста вінаватым паводле ч. 1 арт. 367 КК (паклёп у дачыненні да прэзідэнта) за шэраг артыкулаў з крытыкай улады. Пачобута прыгаварылі да трох гадоў пазбаўлення волі з адтэрміноўкай выканання на два гады. Судовы працэс быў закрытым. 20 верасня Гродзенскі абласны суд не задаволіў касацыйную скаргу карэспандэнта польскай "Газеты выборчай" на прыгавор раённага суда і пакінуў яго ў сіле.

Дзмітрый Уласаў, БелаПАН.