«Выказвалі свае палітычныя інтарэсы шляхам размяшчэння на акне белага аркуша паперы»

У Мінску асудзілі чатырох жыхароў сталіцы за белыя аркушы паперы на вокнах. Мінчукоў затрымлівалі ў кватэрах 25 ліпеня.

Адміністрацыйныя справы разглядаліся ў судзе Фрунзенскага раёна Мінска. Мінчукоў судзілі за «парушэнне парадку арганізацыі або правядзення масавых мерапрыемстваў», піша Zerkalo.io са спасылкай на праваабаронцаў.

42-гадовай Маі Шатохінай і 26-гадоваму Юрыю Клімашэўскаму прысудзілі па 15 сутак. Справы разглядала суддзя Юлія Чыж.

Мужчыну і жанчыну абвінавачвалі ў «выражэнні сваіх палітычных інтарэсаў шляхам размяшчэння на акне аднаго белага аркуша паперы». Мінчукоў затрымлівалі дома. У Юрыя таксама правялі агляд і канфіскавалі два тэлефоны і два ноўтбукі. Мінчукі на судзе гаварылі, што лісты паперы віселі, але на іх былі запісы.

Мая Шатохіна аркуш зняла адразу, як ёй патэлефанавалі з міліцыі з нагоды дадзенага прадмета на акне, і нават знялі відэа, што там ужо нічога няма.

32-гадовага Дзяніса Кулікова і 31-гадовага Андрэя Мураўёва таксама затрымлівалі дома.

Справу разглядала суддзя Марыя Ярохіна.

Згодна з пратаколам, на акне ў Дзяніса вісела два аркушы паперы, а ў Андрэя — чатыры.

Суддзя цікавілася «сэнсавай нагрузкай» паперы на акне. Мужчыны сцвярджалі, што аркушы віселі не праз іх палітычныя погляды.

Кулікоў атрымаў 13 сутак, Мураўёў — 28.