За абразы суддзі, чыноўніка, супрацоўніка міліцыі і Лукашэнкі жыхарцы Магілёва прысудзілі тры гады калоніі

У судзе Ленінскага раёна Магілёва 12 ліпеня завяршыўся разгляд крымінальнай справы Ганны Кандраценка. Жанчыну абвінавацілі адразу па трох артыкулах Крымінальнага кодэкса: абраза прадстаўніка ўлады, абраза Лукашэнкі і абраза суддзі альбо народнага засядацеля.

Судовы працэс вяла суддзя Наталля Панасенка, паведамляюць праваабаронцы.

Суд пачаўся 30 чэрвеня і праходзіў у закрытым рэжыме.

Па матэрыялах абвінавачання 37-гадовая жыхарка Магілёва на працягу 2021 года ў некалькіх дэструктыўных Telegram-каналах размяшчала абразлівыя каментары ў адрас кіраўніка дзяржавы, старшыні Гарадзенскага абласнога выканаўчага камітэта, суддзі, а таксама супрацоўнікаў праваахоўных органаў.

З улікам прадстаўленых дзяржаўным абвінаваўцам доказаў суд прызнаў Панасенка вінаватай ва ўчыненні злачынстваў па ч. 1 арт. 368, арт. 369 і арт. 391 Крымінальнага кодэкса і па сукупнасці прысудаў ёй прызначанае канчатковае пакаранне ў выглядзе пазбаўлення волі на тэрмін тры гады ў калоніі агульнага рэжыму, а таксама штрафу ў памеры 100 базавых велічынь (3200 рублёў).