Жаночы гранд-марш салідарнасці: анлайн (фота, трансляцыя, абнаўляецца)
У Мінску адбываецца жаночы гранд-марш.
29 жніўня ў Мінску анансаваны жаночы гранд-марш салідарнасці. Жаночая акцыя мусіць пачацца ў 16:00 са збора на плошчы Перамогі.
19:24 Жанчыны разыходзяцца каля плошчы Бангалор. Марш скончаны.
19:00 Пры спробах блакаваць рух жанчын і перакрываць вуліцц ўдзельніцы праяўляюць крэатыўнасць. Разбітае на дзве часткі шэсце спынілася, дзяўчаты сталі вакол сілавікоў і скандуюць «Мы атачылі АМАП!»
19:10 Жанчыны выйшлі на праезжую частку перад аўтазакамі.
18:40 На бульвары Шаўчэнкі пачаліся затрыманні. Людзі з балконаў будынкаў крычаць "Ганьба!", "Фашысты!"
Як паведамілі ў тэлеграм-канале, з тралейбуса выцягнулі хлопца і дзяўчыну, у якіх былі бел-чырвона-белыя браслеты.
18:20 Удзельніцы шэсця пайшлі ў бок Камароўскага рынка. Атмасфера па дарозе на рынак нагадвае свята. Удзельніцы спяваюць "Тры чарапахі», дзеляцца адзін з адным вадой, крычаць: «Трыбунал» і «Я тут шпацырую», фразу якая належыць 73-гадовай удзельніцы акцый Ніне Багінскай. Калона жанчын не спыняецца на Камароўцы, а ідзе да Нямігі па Куйбышава.
Шэсце з вышыні.
17:55 Удзельніцы скандуюць "АМАП баіцца жанчын"
17:50 Праспект у раёне перакрыжавання з Казлова перакрыты аўтобусамі, бусамі, аўтазакамі. Там жа машыны з калючым дротам. Так сілавікі рэагуюць на мірны марш жанчын.
17:30 Жаночае шэсце дайшло да Акадэміі навук. Міліцыя перакрыла далейшы шлях.
17:15 Тым часам "Наша Ніва" паведамляе, што затрыманы журналіст DW Паўлюк Быкоўскі, яго вязуць у Кастрычніцкі РУУС.
І яшчэ відэа з жаночага марша.
17:10 Жанчыны мінаюць плошчу Якуба Коласа.
17:00 На жаночым маршы заўважілі Марыю Калеснікаву.
16:40 Вялікая колькасць жанчын ідзе на плошчу Якуба Коласа.
16:36 АМАП затрымаў карэспандэнта Свабоды Алеся Пілецкага падчас вядзення стрыму. Трансляцыя Свабоды перарвалася.
16:35 Жанчыны доўгі час рухаліся па праспекце то ў адзін бок, то ў іншы. АМАП стаў выціскаць жанчын на ходнікі.
16:20 Тэлеграм-каналы паведамляюць пра людзей з расейскімі і георгіеўскімі сцягамі, якія стаяць каля плошчы Перамогі.
16:10 АМАП заблакаваў пешаходны пераход праз праспект Незалежнасці. Тады жанчыны перакрылі рух, каб дзве часткі праспекта змаглі аб'яднацца.
16:05 Дзяўчына стаіць каля аўтазака, у які затрымалі хлопца.
16:00 Каля жанчын з'явіліся вўтазакі і АМАП. Міліцыянты кажуць пра несанкцыянаванасць акцыі і просяць разысція.
Жанчыны пачалі рух у бок цырка. Тым часам АМАП затрымаў хлопца, змясціў у аўтазак.
15:50 Жанчыны пачынаюць збірацца на плошчы.
15:40 На плошчы перамогі стаіць ачапленне з міліцыянтаў. Міма праехала вялікая калона байкераў з бел-чырвона-белымі сцягамі.
