Зміцер Дашкевіч — пра катаванні ў ІЧУ: Ніколі не быў у такіх умовах за ўсю гісторыю сваіх зняволенняў
Грамадскага дзеяча і былога палітзняволенага Змітра Дашкевіча затрымалі ўвечары 25 кастрычніка. Сёння яго судзілі.
Зміцер Дашкевіч падчас аднаго з маршаў у Мінску. Фота Дзмітрыя Дзмітрыева
«Змясцілі ў карцар, не дазволілі адшпіліць ложак ад сцяны. То-бок спаць прапанавалі на голым халодным бетоне, — расказаў Зміцер Дашкевіч. — Змыў не працуе, вады ў карцары няма зусім, не далі нават бутэльку вады, каб змыць туалет. Я ніколі не быў у такіх умовах за ўсю гісторыю сваіх зняволенняў у розных месцах Беларусі. Сутыкаўся з тым, што даводзілася спаць на дошках, але ніколі не было такога, каб у камеры — толькі голы бетон. Запытаўся ў начальніка ІЧУ, ці гэта па законе, той сцвяржджае, што так, гэта нібыта законна».
Яго словы пераказаў «Нашай Ніве» Юра Сідун, сябар сям'і Дашкевічаў, які прысутнічаў у судзе Маскоўскага раёна Мінска.
Зміцер Дашкевіч заявіў пра недавер судовай сістэме ў сувязі з катаваннямі ў ІЧУ.
Суддзя абвесціла перапынак у паседжанні да заўтра да 9:30.
Затрыманага разам са Змітром Дашкевічам хрысціянскага актывіста Арцёма Ткачука суддзя Маскоўскага суда Мінска Сяргей Кацар сёння асудзіў на 12 сутак арышту, хоць Ткачук прасіў абмежавацца штрафам, бо мае двух маленькіх дзяцей: паўтара і чатыры годзікі.
У Дашкевіча маленькіх дзяцей трое.
Паводле «Нашай Нівы»