Журналістка Ірына Слаўнікава прызнана палітзняволенай

Усяго за кратамі ў Беларусі сёння знаходзяцца каля трох дзесяткаў журналістаў.

Праваабаронцы прызналі палітзняволенай журналістку Ірыну Слаўнікаву, паведамляе «Вясна».

30 кастрычніка Ірыну Слаўнікаву затрымалі ў мінскім аэрапорце, калі яна з мужам вярталіся з адпачынку. Іх абодвух 1 лістапада суддзя Першамайскага раёна Максім Трусевіч асудзіў да 15 сутак арышту нібыта за захоўванне ў Facebook матэрыялаў, якія былі прызнаныя «экстрэмісцкімі».

Таксама 4 лістапада стала вядома, што жаночая камера, у якой утрымлівалася Ірына Слаўнікава, абвясціла групавую галадоўку праз нечалавечыя ўмовы ўтрымання зняволеных.

15 лістапада другі раз запар журналістка Ірына Слаўнікава была пакарана 15 суткамі арышту у судзе Першамайскага раёна Мінска (суддзя Максім Трусевіч) па абвінавачванні ў «дробным хуліганстве».

26 лістапада стала вядома, што Ірына Слаўнікава стала падазраванай паводле артыкула 342 Крымінальнага кодэксу («Арганізацыя і падрыхтоўка дзеянняў, якія груба парушаюць грамадскі парадак, або актыўны ўдзел у іх»).

Усяго ў Беларусі цяпер афіцыйна прызнаны палітвязнямі 892 чалавека.