Галоўныя запісы N.R.M. упершыню з'явіліся на лічбавых пляцоўках

20 сакавіка на лічбавых музычных пляцоўках упершыню з'явіліся ўсе альбомы гурта N.R.M., створаныя класічным складам у 1995–2007 гадах.

Калектыў быў заснаваны ў 1994 годзе на парэштках гурта «Мроя» Лявонам Вольскім (вакал, гітара),  Пітам Паўлавым (гітара), Юрасём Ляўковым (бас-гітара), Алезісам Дземідовічам (бубны).

Першую сур’ёзную папулярнасць N.R.M. прынеслі альбомы «Одзірыдзідзіна» (1996) і «Пашпарт грамадзяніна N.R.M.» (1998). Статус аднаго з галоўных беларускіх гуртоў усіх часоў — альбомы «Тры  чарапахі» (2000) і «Дом культуры» (2002).

У гэтым складзе музыкі стварылі шэсць студыйных альбомаў, якія ніколі не прысутнічалі на лічбавых пляцоўках, таму што ў 2010 годзе шляхі Лявона Вольскага і астатніх удзельнікаў разышліся.

А між тым попыт на запісы гурта ёсць дагэтуль. У 2019 годзе сэрвіс «Яндэкс Музыка» праводзіў у Беларусі апытанне наконт таго, якіх артыстаў найперш бракуе яго айчынным карыстальнікам. N.R.M. тады трапілі ў топ-5 разам з Rammstein, Metallica, Tool і King Crimson. Сёння на пляцоўцы з’явіўся апошні артыст з гэтай пяцёркі.



— Песні N.R.M. ведаюць мільёны беларусаў, гэта жывая гісторыя беларускай музыкі, — адзначае Зміцер Безкаравайны, кіраўнік лэйбла MediaCube Music, адказнага за перавыданне. — Працэс перамоваў і тэхнічнай падрыхтоўкі рэлізу заняў каля трох месяцаў. Мы ўдзячныя ўсім бакам за канструктыўны падыход, які дазволіў ажыццявіць гэты праект.

— Вельмі добра, што нарэшце спадчына гурта ўпарадкаваная: можна афіцыйна і зручна паслухаць песні на лічбавых пляцоўках, — напісаў Лявон Вольскі з гэтай нагоды ў сваім Facebook. — Для мяне гэтая падзея яшчэ і нагода паглядзець, наколькі гэты стары (калі не сказаць «старажытны») матэрыял запатрабаваны ў цяперашняй шырокай публікі. Ці будзе яна актыўна стрыміць гэтыя творы, ці не? Досыць цікавы тэст!

— Гэта нармальны і просты крок для сучасных гуртоў, але для класічных запісаў N.R.M. яго цалкам можна назваць гістарычным, — адгукнуліся Піт Паўлаў, Юрась Ляўкоў і Алезіс Дземідовіч. — Калісьці менавіта ў N.R.M. з’явіўся першы беларускі музычны сайт. Можна казаць, што гасцёўня сайту зрабілася прадвеснікам сучасных сацсетак, дзе ў адным чаце тусілі ўсе. Наогул, шмат чаго можна ўзгадаць, слухаючы гэтыя запісы. Слухайце ўсе альбомы N.R.M. на ўсіх музычных пляцоўках.Прыемных успамінаў!

Адзіная спасылка на альбомы класічнага складу N.R.M. на пляцоўках (спіс будзе дапаўняцца) — https://music.mediacube.network/hurtNRM

 Паводле прэс-рэлізу