Слоўнік Collins назваў «Слова года» — 2022. Беларусы ў ім жывуць

Выдавецтва «Harper Collins», якое выпускае слоўнік «Collins English Dictionary», назвала слова 2022 года — permacrisis. Яно азначае перманентны або пастаянны крызіс. Складальнікі слоўніка тлумачаць яго як «працяглы перыяд нестабільнасці і небяспечнасці».

У «Harper Collins» растлумачылі, што гэтае слова адносіцца да крызісу, які аб'ядноўвае палітычную нестабільнасць, канфлікт ва Украіне, кліматычныя змены ды рост кошту жыцця і працягваецца ва ўсім свеце.

Сярод прэтэндэнтаў на тытул «Слова года» былі іншыя словы і выразы:

• partygate — гэта слова азначае скандал, звязаны з вечарынкамі экс-прэм'ера Вялікабрытаніі Борыса Джонсана падчас пандэміі каранавіруса. Яны выклікалі шырокі грамадскі рэзананс і ўрэшце каштавалі Джонсану пасады;
• Carolean («каралінскі») — гэта слова азначае ўсё, што звязана з іменем новага караля Вялікабрытаніі Карла III;
• warm banks («банкі цяпла») — так называюць месцы, дзе незаможныя людзі, не здольныя ацяпляць свае дамы, могуць сабрацца ў халодны час, каб сагрэцца;
• Kyiv — сталіца Украіны;
• lawfare — прымяненне юрыдычных механізмаў у дачыненні да апанента;
• vibe shift — значная змена дамінуючай тэндэнцыі ў культуры;
• quiet quitting — «ціхае звальненне», якое апісвае сітуацыю, калі супрацоўнік выконвае толькі свае прамыя абавязкі;
• sportswashing — прасоўванне спартыўнага мерапрыемства дзеля адцягнення ўвагі ад спрэчнай дзейнасці;
• splooting — так называюць позу, у якой жывёліна ляжыць на жываце з распластанымі лапамі.

Паводле «Наша Н*ва»