Святлана Алексіевіч атрымала прэстыжную літаратурную прэмію імя Капусцінскага
14 мая ў залі Драматычнага тэатра ў Палацы культуры і навукі ў Варшаве пісьменніцы Святлане Алексіевіч ўручылі прэстыжную літаратурную прэмію імя Рычарда Капусцінскага за кнігу «Час сэканд хэнд».
Пра гэта паведаміла журналістка Юлія Слуцкая.
Міжнародная прэмія прысуджаецца ўжо шосты раз за лепшы літаратурны рэпартаж, перакладзены на польскую мову.
Святлана Алексіевіч ўпершыню ў гісторыі прэміі Капусцінскага атрымала гэтую ўзнагароду двойчы. Прэмія імя Рычарда Капусцінскага ўручаецца за лепшую рэпарцёрскую кнігу, якая закранае важныя праблемы сучаснасці, прымушае думаць, паглыбляе веды аб свеце і іншых культурах. Яе арганізатарамі з’яўляюцца мэрыя Варшавы і «Gazeta Wyborcza».
Рычард Капусцінскі (1932-2007) нарадзіўся ў Пінску. Журналіст і пісьменнік, аўтар больш за дзесяці публіцыстычных кніг, лаўрэат шматлікіх літаратурных прэмій і ўзнагарод. У Польшчы яго называлі «каралём рэпартажу». Ён працаваў у Афрыцы, сярэднеазіяцкіх савецкіх рэспубліках, Лацінскай Амерыцы, Блізкім Усходзе, пісаў рэпартажы з дзесяткаў краін свету.