Украінскі пісьменнік Сяргей Жадан атрымаў прэстыжную літаратурную прэмію Angelus

Пісьменнік Сяргей Жадан стаў трэцім украінцам, які атрымаў прэстыжную літаратурную прэмію Angelus. Гэтай прэміяй у Польшчы адзначаюць лепшых аўтараў Цэнтральнай Еўропы.



Аргкамітэт адзначыў Жадана за раман «Месапатамія», паведамляе "Радыё Свабода".

Па ўмовах прэміі, пераможца атрымае чэк на 150 тысяч злотых (гэта амаль 40 тысяч долараў).

Міжнародная літаратурная прэмія Angelus была заснавана ў 2006 годзе ў Вроцлаве. Па ўмовах прэміі, статуэтку анёла аўтарства Евы Рассана і грашовую ўзнагароду атрымлівае аўтар з краін Цэнтральнай Еўропы за празаічную кнігу, перакладзеную і выдадзеную ў Польшчы на ​​працягу апошняга года.
 

У 2013 годзе лаўрэатам гэтай прэміі за кнігу «Музей пакінутых сакрэтаў» стала Аксана Забужко, а першым сярод адзначаных аргкамітэтам у 2006 годзе быў Юрый Андруховіч за раман «Дванаццаць абручоў».

У 2011 годзе прэміяй Angelus за твор «У вайны не жаночае аблічча» была адзначаная беларуская пісьменніца Святлана Алексіевіч, якая ў гэтым годзе атрымала Нобелеўскую прэмію.