З Рэспубліканскага тэатра беларускай драматургіі звальняюць акцёраў

5 красавіка з Рэспубліканскага тэатра беларускай драматургіі звольнілі актрысу Алену Баяраву. Яна адпрацавала ў тэатры 22 гады. Потым стала вядома пра сыход яшчэ траіх артыстаў, паведамляе «Еўрарадыё».

«Калегам, якія будуць граць мае ролі, — поспеху. А я — у чаканні новых творчых прапаноў», — напісала Алена Баярава (на здымку) у сацсетках.

Як высветлілі журналісты, за сакавік — пачатак красавіка 2022 года з тэатра сышлі яшчэ трое акцёраў: Марыя Пятровіч, Марына Здаранкова і Максім Шышко. Біяграфіі ўсіх траіх зніклі з сайта РТБД.

Дарэчы, Максіма Шышко 27 лютага затрымлівалі на антываеннай дэманстрацыі. Пазней з'явілася інфармацыя, што яго выслалі з Беларусі і забаранілі ўезд на 10 гадоў. Максім нарадзіўся ва Украіне ў 1989 годзе.

Звальненні або вымушаны сыход з тэатра працягваюцца з восені 2020-га. Тады з РТБД сышлі Мікалай Стонька і Андрэй Новік. Стонька такім чынам пратэставаў супраць цэнзуры, а Новік сышоў «на знак салідарнасці з страйкоўцамі і звольненымі».

У траўні 2021 года з Беларусі з'ехаў акцёр Ілля Ясінскі, які ўдзельнічаў раней у акцыях і быў затрыманы падчас аднаго з маршаў. Тады яму зламалі пазванкі. У 2021-м акцёрам зноў зацікавіўся Следчы камітэт, пасля чаго ён пакінуў радзіму.

Напрыканцы снежня 2021 года з РТБД звольнілі мастацкага кіраўніка Аляксандра Гарцуева, які ўзначальваў тэатр з 2012 года.