Жанчыны, якім мы абавязаныя нашымі геніямі

Матулі беларускіх пісьменнікаў не толькі прывялі ў свет будучых беларускіх пісьменнікаў і паэтаў, але і паспрыялі развіццю іх творчага таленту.

У Дзень маці budzma.org прыгадвае неверагодных жанчын, якія падарылі свету і беларускай літаратуры выдатных творцаў — невялікая падборка фотаздымкаў беларускіх паэтаў і пісьменнікаў з маці.

Рыгор Барадулін з маці Кулінай Андрэеўнай

Цёплыя пачуцці да сваёй маці Куліны АндрэеўныРыгор Барадулін пранёс праз усё жыццё.

У сваіх успамінах ён пісаў: «Пра маму можна гаварыць доўга. Мама мая была выключным чалавекам, карэннай крывічанкай. Дзякуючы ёй я вырас натуральным беларусам. Яна выдатна ведала беларускія песьні, казкі і нашу крывіцкую, вушацкую мову. Мама дала мне і жыцьцё, і лёс. Як і кожны чалавек, я не ўяўляю сябе бяз мамы. Калі б не яна, нічога зь мяне не атрымалася б... Мае ўспаміны: на хутары заходзіць сонца, а мама расказвае нейкую страшную казку, і мне неяк жудасна і трывожна. І, зразумела, першыя ўспаміны — гэта маміны вочы, маміны словы, мамін голас».

Генадзь Бураўкін з маці Феадосіяй Ягораўнай

Дзяцінства Генадзя Бураўкіна прыпала на пачатак Вялікай Айчыннай вайны, бацька пайшоў на фронт, маці засталася з дзецьмі адна. Ёё давялося прайсці праз голад, нястачу, страх за дзяцей.

Феадосія Ягораўна да канца жыцця захавала выключную памяць і ва ўросце 98 гадоў чытала на памяць вершы, якія вучыла ў школе. «І ня толькі Якуба Коласа, але і Кандрата Крапівы, яна памятае песьні той пары», — расказваў пра маці Генадзь Бураўкін.

Матуліны рукі: медытацыя для атрымання дапамогі, абуджэння і натхнення

Максім Танк з маці Домнай Іванаўнай

Менавіта маці Яўгена Скурко (так насамрэч звалі будучага паэта Максіма Танка) угаварыла дзеда даць сыну магчымасць вучыцца — дзед супраціўляўся, бо гэта былі занадта вялікія расходы для сям’і.

Вось як апісвае гэты момант паэт у аўтабіяграфіі: «Бацькі мае хацелі, каб я пайшоў вучыцца далей. Але непрыхільна на гэта глядзелі хатнія, баючыся лішніх расходаў у гаспадарцы. Маці плакала начамі, прасіла дзеда, каб пусціў мяне вучыцца ў Вілейку, дзе ў той час была сярэдняя школа. Стары згадзіўся. За лета, пасучы статак, я падрыхтаваўся да экзамену, які здаў, і быў прыняты...»

Як выявілася пазней, маці не дарма ўгаворвала дзеда. Менавіта ў Вілейскай гімназіі, куды паступіў Яўген, настаўніца прывіла яму любоў да літаратуры, заахвоціла да творчасці. Там жа ён і зрабіў сваю першую літаратурную спробу.

Васіль Быкаў з маці Ганнай Рыгораўнай

Васіль Быкаў так згадваў матулю ў сваім творы «Пункціры жыцця»: «Маці была дужа далікатная характарам, не надта здаровая, часта хварэла. Я не чуў ад яе якой сваркі з бацькам, ніводнага злосна-пагрозлівага слова да дзяцей. Усё — ласкава, лагодна, з нейкай застарэлай тугой у душы».

Іван Шамякін з маці Сынклеціяй Сцяпанаўнай

Маці Івана Шамякіна — Сынклеція Сцяпанаўна Калініна — паходзіла з багатай сялянскай сям’і, але была непісьменная. Умела толькі распісацца і чытала па складах.

Максім Багдановіч з маці Марыяй Апанасаўнай

Маці Максіма Багдановіча — Марыя Апанасаўна — належала да старажытнага шляхецкага роду герба «Курч». Скончыла Аляксандраўскае вучылішча і атрымала вышэйшую адукацыю настаўніцы ў Санкт-Пецярбургу.

Вось як апісваў жонку бацька Максіма Багдановіча Адам Ягоравіч: «Незвычайная жвавасць успрымання, пачуцця і рухаў была асноўнай, выбітнай рысай яе натуры. Рухомая, заўсёды вясёлая, з іскрыстымі вачыма, з касой жахлівай велічыні, яна ў дадатак валодала грацыяй кацяняці і тым захапляльна чароўным хараством, якое прынята называць жаноцкасцю. Яе карткі не даюць ніякага паняцця не толькі пра яе духоўнае аблічча, але нават і пра знешняе. Гэта — маска, пазбаўленая жыцця, а яна была ўся зіхоткая, пяючая жыццё, уся рух, радасць, захапленне».

Збіццё, вялізарныя тэрміны, помста. Як рэжым ваюе з беларускімі маці

Марыя Апанасаўна памерла ад сухотаў ва ўзросце 27 гадоў. Максіму на той момант было ўсяго 5 гадоў.

Уладзімір Караткевіч з маці Надзеяй Васільеўнай

Маці Уладзіміра Краткевіча — Надзея Васільеўна — скончыла Марыінскую гімназію ў Магілёве, добра ведала сусветную літаратуру. Некаторы час яна працавала настаўніцай у сельскай школе пад Рагачовам, пасля замужжа занялася хатняй гаспадаркай.