Сяргей Гаранін: Мы ўцягваемся ў расійскую смуту

Стала вядома аб стварэнні пад Асіповічамі лагера ПВК «Вагнер».  Сяргей Гаранін, які ўжо паспеў адсядзець пры рэжыме Лукашэнкі, выказаўся на гэты конт.

Сяргей Гаранін у сваім фэйсбуку напісаў:

Гісторыя заўсёды выбірае найгоршы сцэнар развіцця з магчымых.

І яна яго выбрала: у Беларусі пад Асіповічамі ўжо прыступілі да будаўніцтва навучальна-трэніровачнага лагера для 8 тысяч вагнераўцаў. Пасля іх стане больш.

І гэта не войска.

Гэта горш.

Паколькі ні сілавыя структуры РФ, ні грамадзяне Расіі, якія, па даных сацапытанняў, як бы падтрымліваюць Пуціна, абараняць цэнтральную ўладу не здольны і, як паказаў няўдалы путч, абараняць яе не хочуць, надыходзіць час магутных феадалаў — Прыгожына, Кадырава, Золатава, Мізінскага, Цяплінскага, якія валодаюць рэальнай сілай і рэальнымі фінансавымі магчымасцямі. Гэтыя феадалы будуць ірваць шматкі развальнай імперыі, грызці адзін аднаго ў бясконцай грамадзянскай вайне.

Гэта і ёсць Смута.

Калі-небудзь у ёй пераможа самы жорсткі, самы хітры і беспрынцыповы, самы подлы і вераломны.

Але гэта некалі.

А цяпер, падаўшы сваю тэрыторыю і аснову аднаму з самых адыёзных феадалаў, мы ўжо ўцягваемся ў рускую Смуту з усімі яе будучымі крывавымі страхамі.

Магчыма, Беларусь проста знікне, згубіцца ў крывавым хаосе рускай Смуты...