Амбасадар: палітыка Германіі ў дачыненні да Беларусі не зменіцца

Незалежна ад таго, якім будзе новы ўрад Германіі, яго падыход у дачыненні да Беларусі не зменіцца. Пра гэта 22 верасня заявіў германскі пасол у Мінску Вольфрам Маас.  



Паводле яго слоў, у нямецкіх партый няма асаблівых адрозненняў у падыходзе да Беларусі. Ён таксама заявіў, што пытанні аб праблемах у галіне правоў чалавека — "гэта не тыя пытанні, па якіх можна весці гандаль".

Дыпламат таксама паведаміў, што ЕС чакае ад Беларусі канкрэтных крокаў у адказ на прыпыненне санкцый у дачыненні да кіраўніка МЗС Уладзіміра Макея, напрыклад, вызваленне зняволеных апазіцыянераў або ўвядзенне мараторыя на смяротнае пакаранне, перадае БелаПАН.
 

Разам з тым Вольфрам Маас заявіў, што ЕС пакуль не накіроўваў Беларусі запрашэння ўдзельнічаць у саміце Усходняга партнёрства ў Вільнюсе ў канцы лістапада.

Маас: таваразварот Беларусі і Германіі скараціўся

Пасол адзначыў, што аб'ём таваразвароту ў 2013 годзе паміж Беларуссю і Нямеччынай трохі скараціўся, хоць "геаграфічнае становішча, лагістыка, кваліфікацыя працоўнай сілы добра падыходзяць для таго, каб значна інтэнсіфікаваць супрацоўніцтва паміж Беларуссю і Нямеччынай".
 

Паводле яго слоў, бізнэсоўцы ў пошуках партнёраў для супрацоўніцтва аналізуюць умовы работы па ўсім свеце, звяртаючы ўвагу на такія фактары як стабільнасць, вяршэнства закона, прадказальнасць, надзейная прававая сістэма. "Ад гэтага залежыць, які вобраз гэтая краіна мае ў вачах партнёра", — сказаў Вольфрам Маас.

Нагадаем, кансерватыўны блок ХДС/ХСС, які ўзначальвае канцлерам Ангелай Меркель, атрымаў упэўненую перамогу на выбарах у бундэстаг Германіі. Кааліцыя Хрысціянска-дэмакратычнага саюза і Хрысціянска-сацыяльнага саюза набрала 41,5 % галасоў, паказаўшы, такім чынам, найлепшы вынік з моманту аб'яднання Заходняй і Усходняй Германіі.

Паводле telegraf.by