Амерыканская амбасада ў Маскве заклікала грамадзян ЗША неадкладна пакінуць Расію
«Грамадзяне ЗША павінны адмовіцца ад паездак у Расію, а тыя, хто пражывае або падарожнічае цяпер у Расіі, павінны неадкладна пакінуць краіну, пакуль застаюцца абмежаваныя магчымасці для выезду на прыватнай аснове», — гаворыцца ў паведамленні.
Дыпламаты звязваюць гэта з абвяшчэннем мабілізацыі ў Расіі і паказваюць, што не выключаны прызыў на ваенную службу асоб з двайным грамадзянствам.
Нагадаем, што раней з падобнымі рэкамендацыямі да сваіх грамадзян звярнуліся знешнепалітычныя ведамствы Польшчы, Балгарыі і Эстоніі. Прычым Эстонскі МЗС падкрэсліў, што Расія ставіцца да людзей з двайным грамадзянствам, як да сваіх грамадзян, а значыць, яны могуць падлягаць мабілізацыі.
