Беларускія дэмсілы правялі першую афіцыйную сустрэчу з Радай Еўропы

Увечары 7 лістапада беларускія дэмакратычныя сілы распачалі афіцыйнае супрацоўніцтва з Радай Еўропы. У кантактную групу ўвайшлі 10 чалавек, якія прадстаўляюць беларускія дэмакратычныя сілы, у тым ліку Каардынацыйную раду.

photo_2022_11_07_20_25_36_1024x768.jpg

Як паведамляе прэс-служба Каардынацыйнай рады, Святлана Ціханоўская падчас выступу на мерапрыемстве сказала, што стварэнне групы — першы крок па ўступленні Беларусі ў Раду Еўропы.

Удзельнікі сустрэчы абмеркавалі прыярытэты, сярод якіх правы чалавека, палітвязні, інстытуты дэмакратыі і вяршэнства права.

Асабліва адзначылі важнасць накіравання ўсіх дзеянняў на беларусаў унутры Беларусі.

— Мы дамовіліся аб выпрацоўцы канкрэтнага плана дзеянняў і праграм супрацоўніцтва, — распавядае ўдзельніца ад КР. — Вельмі важна адзначыць, што група адкрытая для прапановаў звонку. Яна не абмяжоўваецца канкрэтным складам удзельнікаў і будзе запрашаць экспертаў па розных напрамках да супрацоўніцтва.

У групу з боку Рады Еўропы ўваходзяць прадстаўнікі ўсіх ключавых палітычных арганізацыяў РЕ, уключаючы ПАРЭ і Офіс камісара па правах чалавека.

Нагадаем, што супрацу з афіцыйнымі беларускімі ўладамі Рада Еўропы прыпыніла ў сакавіку 2022 года ў сувязі з удзелам Беларусі ў вайсковай агрэсіі супраць Украіны. У той жа час камітэт вырашыў падтрымліваць і ўмацоўваць адносіны з беларускай грамадзянскай супольнасцю і дэмакратычнымі сіламі Беларусі.