Часовага паверанага Беларусі выклікалі ў МЗС Польшчы

8 кастрычніка часовы павераны ў справах Беларусі ў Польшчы Аляксандр Часноўскі быў выкліканы ў МЗС Польшчы «ў сувязі з сітуацыяй на польска-беларускай мяжы і агрэсіўнымі дзеяннямі Рэспублікі Беларусь супраць Польшчы», паведамляе польскае МЗС.

Беларускага дыпламата прыняў дырэктар усходняга дэпартамента польскага МЗС. У ведамстве падкрэслілі, што гэта чарговы раз, калі прадстаўніка Беларусі выклікаюць у МЗС.
Нагадаем, як распавяла прэс-сакратарка Памежнай службы Польшчы Ганна Міхальская, на мяжы Беларусі і Польшчы з беларускага боку абстралялі польскі патруль. Ніхто з вайскоўцаў не пацярпеў.