Якой краіны не будзе праз 100 гадоў? Беларусь — у кандыдатах на знікненне
На форуме Reddit, вельмі папулярным у ЗША, Канадзе і Вялікабрытаніі, зʼявілася пытанне «Якая краіна з найменшай імавернасцю будзе існаваць праз 100 гадоў?». Сярод адказаў карыстальнікаў большасць лайкаў набраў адказ «Мальдзівы». Другім па папулярнасці стаў адказ «Беларусь».
Асобныя карыстальнікі пад гэтым адказам патлумачылі, чаму яны таксама так лічаць.
«У 1997 годзе Беларусь і Расія ўжо падпісалі дамову аб Саюзнай дзяржаве, якая заклала аснову для паглынання Беларусі Расійскай Федэрацыяй», — напісаў адзін з карыстальнікаў.
«У іх агульны Мытны саюз (пры ўездзе ў адну ці другую краіну вы атрымліваеце адзіную міграцыйную карту для абедзвюх краін) і яны прапаноўваюць масу льгот грамадзянам адна адной, аднак у іх свае асобныя пашпарты. Чорт пабяры, я нават бачыў беларускае пасольства ў Маскве. Беларусь успрымаецца як меншая, ціхая і больш гопніцкая версія Расіі, але яна прадукуе шмат сельскагаспадарчай тэхнікі».
Іншы карыстальнік напісаў, што хутчэй за ўсё прычына ў палітыцы Пуціна, які імкнецца стварыць мяжу (буферную зону) паміж Расіяй і Еўропай і пры гэтым мець кантроль над ёю. Такая буферная зона магла б служыць абаронаю ад ваенных пагроз. І гэта адна з прычын, чаму ўсходнія тэрыторыі Украіны такія каштоўныя для Пуціна.
«Ты маеш рацыю. Палітычнае паглынанне краін Расіяй падрывае ўсю іх (Еўропы) геапалітычную стратэгію, якая заключаецца ў захаванні буфера надзейных саюзнікаў паміж Расіяй і Еўропай», — падтрымлівае меркаванне іншы карыстальнік.
Глядзіце таксама
Але знайшліся тыя, хто выказаў супрацьлеглае меркаванне:
«Так, Расія зараз выглядае цалкам здольнай на паглынанне іншых краін. Калі Лукашэнка памрэ, калі не раней, Беларусь стане дэмакратыяй, уступіць у НАТА і ЕС. Расія выводзіць войскі і тэхніку з Беларусі. Цяпер у іх няма ні магчымасцяў, ні інтарэсаў у захопе Беларусі.
Расія — гулец, які пастаянна падвойвае стаўкі, каб вярнуць свае страты. Гэта зробіць іх занадта аслабленымі, каб умяшацца ў Беларусь. Калі б яны зменшылі свае страты і пакінулі Украіну, калі б стала відавочна, што яны не могуць перамагчы, то ў іх яшчэ б засталіся сілы паглынуць Беларусь. Гэта было б разумна», — піша яшчэ адзін карыстальнік.
«Пацешна, я з Беларусі, і кожны раз, калі пра гэта падымаецца пытанне на Reddit, большая частка таго, што кажуць людзі, проста няправільная ці неверагодна спрошчаная. Прымушае мяне задумацца пра тое, што я чытаю пра іншыя краіны», — запярэчыў карыстальнік з Беларусі.
Reddit — гэта сайт, які спалучае рысы сацыяльнай сеткі і форуму, на якім карыстальнікі могуць размяшчаць якую-небудзь інфармацыю і абмяркоўваць яе. Reddit падтрымлівае сістэму галасавання за ўпадабаныя паведамленні — найбольш папулярныя з іх аказваюцца на загалоўнай старонцы сайта.
Паводле «Наша ніва», BGmedia