Крыніцы: Буйная калона ПВК Вагнера прыбыла ў Беларусь

Сёння раніцай, 15 ліпеня, у Беларусі заўважаная буйная калона легкавых і грузавых аўтамабіляў на нумарах так званых ДНР/ЛНР. Сукупнасць фактараў паказвае, што гэта калона ПВК Вагнера, якая ўначы заехала з Расіі ў раёне Крычава, паведамляе маніторынгавая група «Беларусі Гаюн».

Адзначаецца, што далей «вагнераўцы» прайшлі праз Рагачоў у бок Бабруйска і затым — на Асіповічы. Маршрут паказвае на тое, што калона ПВК Вагнера рахулася ў намётавы лагер у вёсцы Цэль Асіповіцкага раёна.

Паводле наяўных звестак, у калоне былі заўважаны мінімум 60 аўтамабіляў, сярод якіх пікапы, буйныя фуры, «буханкі» і мінімум тры аўтобусы для перавозкі людзей. Калону суправаджала беларуская ДАІ.

Нагадаем, пад Асіповічамі праходзяць трэніроўкі ваеннаабавязаных з Салігорска, якія ўваходзяць у тэрытарыяльную абарону. Учора Міністэрства абароны паведаміла, што інструктарамі там выступаюць байцы ПВК Вагнера, якія прыехалі ў Беларусь раней.

Мінабароны паказала на сваім тэлеканале сюжэт пра трэніроўкі. Інструктары навучаюць ваеннаабавязаных тактычнай стральбе і перамяшчэнню падчас бою. Іх навучаюць байцы ПВК Вагнера, якія «перадаюць ім свой баявы досвед», яны распавядаюць нюансы дзеянняў у розных умовах, гаворыцца ў сюжэце «ВаенТБ».

— Гэта вельмі цікава слухаць. Вядома, яны пабывалі ў баявых дзеяннях. І гэта, несумненна, вельмі карысны вопыт для нашай беларускай арміі, бо мы ў ваенных дзеяннях з заканчэння афганскай вайны не ўдзельнічалі, — распавядае адзін з ваеннаабавязаных.

У сюжэце адзначаюць, што сумнявацца ў «кваліфікацыі і падрыхтоўцы "вагнераўцаў" не даводзіцца», а заняткі пабудаваныя «на асабістым вопыце і разборы рэальных баявых сітуацый».

— Людзі вельмі адукаваныя, ведаюць сваю справу, ведаюць толк у ім, — хваліць інструктараў другі ваеннаабавязаны. — Могуць шмат чаму нас навучыць, гэта вельмі карысны інструмент.

— Неабходна такія мерапрыемствы праводзіць. А мы заматываваныя, гэта адназначна, — кажа трэці ваеннаабавязаны.

Калі вагнераўцы прыйдуць у Беларусь? Вось што кажуць у самой ПВК

Таксама ў сюжэце паказалі намётавы лагер каля вёскі Цэль. Лагер размешчаны паблізу палігона, у ім — «камфортныя ўмовы, гарачае і смачнае харчаванне», адзначае карэспандэнтка.

— Гэта новы спосаб падрыхтоўкі тэрытарыяльных войскаў. У наступным кіраўніцтвам Узброеных сіл будзе прынята рашэнне аб мэтазгоднасці яго выкарыстання, — заявіў у сюжэце начальнік аддзела ўпраўлення тэрытарыяльнай абароны Генштаба ВС Максім Паеўскі.

Колькі байцоў ПВК Вагнера прыбыло ў Беларусь, Мінабароны не паведамляе. Самі «вагнераўцы», у якіх перад камерамі закрытыя твары, каментароў прапагандыстам не давалі.