Лябедзька адклікаў заяўку на правядзенне сацыяльнага марша 14 сакавіка

Старшыня Аб'яднанай грамадзянскай партыі Анатоль Лябедзька адклікаў заяўку на правядзенне 14 сакавіка ў Мінску сацыяльнага марша. Пра гэта палітык напісаў на сваёй старонцы ў Фэйсбуку.



Крыніца: Радыё свабода

Заяўка на вулічную акцыю была пададзеная ў Менгарвыканкам 29 лютага. Пры гэтым час і месца збору, а таксама маршрут шэсця цалкам супадалі з часам і месцам правядзення маршу прадпрымальнікаў, таксама запланаванага на 14 сакавіка.

Заяўка на марш прадпрымальнікаў была раней пададзеная палітыкам Мікалаем Статкевічам і старшынёй РГА «Перспектыва» Анатолем Шумчанкам. Шэсце плануецца правесці з 13:00 да 16:00 ад Акадэміі навук па вуліцах Сурганава і Арлоўскай да парку Дружбы народаў.

Анатоль Лябедзька тлумачыў намер правесці ініцыяваную ім акцыю адначасова з акцыяй прадпрымальнікаў неабходнасцю кансалідацыі грамадства.

«Мне падабаецца рабіць людзей шчаслівымі. Сёння мы ашчасцілі Анатоля Шумчанка і Мікалая Статкевіча. Толькі што адклікалі нашу заяўку на акцыю 14 сакавіка, адзіны сэнс якой быў у далучэнні да пратэсту прадпрымальнікаў людзей іншых прафесій і заняткаў (а не палкі ў чыесьці колы), - напісаў Лябедзька, каментуючы адкліканне заяўкі. - Але гэта выклікала такі прыступ абурэння Мікалая і Анатоля, што мы прынялі рашэнне пажадаць ім шчасця і добрай дарогі! »

«Мы адклікалі заяўку на мерапрыемства, але не заяўку на стратэгію аб'яднання і кансалідацыі, - адзначыў Лябедзька. - Я і мая каманда, мы застаемся прыхільнікамі адной вялікай калоны, у якой і пенсіянеры, і студэнты, і прадпрымальнікі, і хатнія гаспадыні, і працоўныя, і айцішнікі. Нам усім патрэбен Новы Эканамічны Курс (НЭК) і праграма структурных рэформаў! Нам жыццёва важна права выбару і сумленныя, свабодныя выбары. Нам патрэбна новая ўлада, адказная, прафесійная і выбраная грамадзянамі Беларусі. І гэта ёсць пляцоўка для аб'яднання ўсіх прыхільнікаў пераменаў ».

Па словах Лябедзькі, зараз яго каманда сканцэнтруецца на інфармацыйнай кампаніі ў падтрымку Дня Волі. «Ужо сёння наведалі некалькі гандлёвых цэнтраў у Мінску і раздалі больш за 400 інфармацыйных матэрыялаў, якія ўключаюць і запрашэнне на Дзень Волі. Запрашэнне з акцэнтам на эканамічны складнік », - напісаў Лябедзька.

Паводле naviny.by.