Лукашэнка паабяцаў навучыць брытанскага міністра гуляць у хакей

Аляксандр Лукашэнка паабяцаў навучыць дзяржаўнага міністра па справах Еўропы і Амерыкі МЗС Вялікабрытаніі Алана Дункана гуляць у хакей на лёдзе.

Сёння, 26 верасня, у Мінску кіраўнік Беларусі сустракаецца з брытанскім міністрам Аланам Дунканам.
Лукашэнка прапанаваў Вялікабрытаніі больш актыўна інвеставаць у Беларусь.
«Давайце вызначым 3-4 салідныя пілотныя эканамічныя праекты (таму што эканоміка — база любых адносін) і рэалізуем іх, — прапанаваў кіраўнік дзяржавы. — Давайце скажам па-народнаму, проста: у Вялікабрытаніі шмат свабодных грошай, якія павінны быць укладзены ў справу. Мы створым самыя зручныя і выгадныя ўмовы для бізнесу і некалькі — 2-3 сумесныя прадпрыемствы — пабудуем у Беларусі, якія будуць працаваць на дзве краіны».
Лукашэнка бачыць патэнцыял у тым, каб сумесна вырабляць у Беларусі прадукцыю, запатрабаваную ў тым ліку на рынку Вялікабрытаніі. 
У час размовы брытанскі дыпламат заўважыў, што ў школьныя гады таксама захапляўся хакеем. Праўда, на траве.
«У школе я захапляўся хакеем, але нам даводзілася гуляць на траве, а не на лёдзе. Я, на жаль, не змог бы гуляць у вашай камандзе», — сказаў Алан Дункан.
На што Аляксандр Лукашэнка прапанаваў госцю навучыцца гуляць у хакей, калі «ёсць жаданне». Спадар Дункан адказаў, што заўсёды гатовы вучыцца, нават нягледзячы на ​​ўзрост.
Паводле БЕЛТА