Масква і Лондан на мяжы высылкі дыпламатаў

Прэм'ер-міністр Вялікабрытаніі Тэрэза Мэй выступіла перад брытанскім парламентам, дзе заявіла, што экс-палкоўнік ГРУ Сяргей Скрыпаль і яго дачка былі атручаныя распрацаваным у Расіі нервова-паралітычным рэчывам з сямейства «Навічок».

МЗС Вялікабрытаніі ў сувязі з гэтым выклікаў расійскага пасла для дачы тлумачэнняў, афіцыйнай рэакцыі Масквы чакаюць да канца сённяшняга дня.
Афіцыйны прадстаўнік МЗС Марыя Захарава адрэагавала на заяву прэм'ер-міністра Вялікабрытаніі Тэрэзы Мэй. Як паведамляе РИА Новости, яна заявіла: «Гэта цыркавое шоў у брытанскім парламенце. Выснова відавочная: чарговая інфармацыйна-палітычная кампанія, заснаваная на правакацыі». Захарава таксама дадала, што ў Брытаніі абавязаны расказаць, чым скончыліся папярэднія справы — Літвіненкі, Беразоўскага, Перапялічнага і многіх іншых.
Хамаватай была і рэакцыя Уладзіміра Пуціна. Як перадае ВВС, на пытанне журналіста брытанскай медыякарпарацыі, не нясе Ці Расія адказнасць за інцыдэнт са Скрыпалем, Пуцін, які знаходзіўся ў Нацыянальным цэнтры збожжа ў Краснадары, адказаў наступным чынам: «Мы тут абмяркоўваем пытанні сельскай гаспадаркі... а вы пытаецеся ў мяне пра нейкія трагедыі. Вы там разбярыцеся у сябе, а потым мы з вамі будзем гэта абмяркоўваць».
Час да вечара у Расіі яшчэ ёсць. Аднак у выпадку калі брытанскі бок палічыць адказ пасла нездавальняючым, Вялікабрытанія гатова распачаць супраць Расіі «больш маштабныя меры», чым у выпадку атручвання іншага расійскага інфарматара брытанскай выведкі, Аляксандра Літвіненкі, віну за якое брытанскія ўлады таксама ўсклалі на Расію.
Сярод мер, якія можа распачаць Лондан, называюць высылку расійскіх дыпламатаў, эканамічныя санкцыі супраць расійскіх бізнэсмэнаў і іншых асоб, звязаных з урадам Расіі, байкатаванне брытанскімі службовымі асобамі чэмпіянату свету па футболе і сумесныя дыпламатычныя дэмаршы з краінамі Еўрасаюза і НАТО.
Сяргей Скрыпаль і яго дачка Юлія былі выяўленыя без прытомнасці на лаўцы ў Солсберы 4 сакавіка. Паліцыя выявіла, што яны былі атручаны нервова-паралітычным газам, ад якога таксама сур'ёзна пацярпеў супрацоўнік паліцыі. Усяго атручэнне атрымаў 21 чалавек.
Паводле belaruspartisan.by