«Такія рэчы трэба паказваць у кабінеце псіхатэрапеўта, а не па тэлевізары ў прамым эфіры»

Палітыка

Аўтар тэлеграм-канала «Лісты да дачкі» аналізуе надзвычай бессэнсоўную прамову Пуціна і нагадвае, што Савецкі Саюз ужо спрабаваў мерацца з NATO стратэгічнымі наступальнымі ўзбраеннямі.

Малюнак з сайта advour.ru

Малюнак з сайта advour.ru


З нагоды ўчорашняга выступлення Пуціна хацеў табе сказаць: «Ад яго зладзейства чакалі, а ён чыжыкам падавіўся». Але потым падумаў, што са злачынствамі ў іх якраз усё ў парадку. Бессэнсоўныя ліхадзействы ў іх атрымліваюцца як ні ў каго іншага. Учора проста падчас выступлення ўзарвалі прыпынак у Херсоне і забілі пяць чалавек.

Праблемы пачынаюцца, калі яны спрабуюць зрабіць што-небудзь асэнсаванае. Хай нават і злачыннае, але каб у ім быў практычны сэнс. Як толькі пачынаюць шукаць сэнс, дык адразу атрымліваецца чыжык. Вось мала таго, што інтэрвенцыя ў іх не заладзілася, то ўжо нават і стратэгічныя вербальныя інтэрвенцыі выдыхнуліся.

Варта было, вядома, весці зваротны адлік да гэтага эпахальнага мерапрыемства, каб зноў расказаць, як Захад іх крыўдзіў у дзяцінстве, і таму яны такімі выраслі. Ну крыўдзіў, усе ўжо ў курсе. У дзяцінстве крыўдзіў, у малалецтве буліў. Пра юнацтва дык увогуле не пры Фрэйдзе будзе сказана.

Пазаўчора абзываў іх, учора Байдэнам у Кіеве троліў. І заўтра ж, што характэрна, зноў пакрыўдзіць. І так літаральна кожны дзень: то прышчэмяць законныя геапалітычныя інтарэсы, то напалохаюць гендарна нейтральнымі. А людзі потым па начах... Ды ўсякае, карацей, бывае. Па начах. Лепш табе не ведаць.

І, вядома, потым хочацца выгаварыцца. А што рабіць? Мае права. Хочаш выгаварыцца — дык ніхто ж не забараняе. Але проста такія рэчы трэба паказваць на ляльцы ў кабінеце псіхатэрапеўта, а не па тэлевізары ў прамым эфіры. Дзеці ж могуць паглядзець. І добра калі дзеці. Яны яшчэ маленькія, ад іх ніякай шкоды. Але гэта ж і дарослыя бачылі. І тыя дарослыя, якія сядзелі ў зале, таксама відавочна пакутавалі на зашчамленне геапалітычных інтарэсаў.

Увогуле, калі гэта быў такі калектыўны псіхатэрапеўтычны сеанс, то яго карысць нейкая сумніўная. Старых траўмаў не вылечылі і толькі нарабілі сабе новых. Ну, прыгразілі амерыканцам, што выйдуць з Дамовы аб стратэгічных наступальных узбраеннях. І што? Стала лягчэй? Памятаецца, Савецкі Саюз ужо спрабаваў мерацца з NATO стратэгічнымі наступальнымі ўзбраеннямі. І вось для яго не вельмі добра ўсё скончылася. А яму ж было чым мерацца. Яму ж у дзяцінстве геапалітычныя інтарэсы ніхто не прышчамляў. У яго, урэшце, Варшаўскі дагавор быў, а не адзін толькі малодшы саюзнік з сельскагаспадарчым народным апалчэннем.

P.S. У малодшага саюзніка ў самога праблемы з тых часоў, як сокалы скінулі пацука на прыступкі Дома ўрада ў дзень адмовы ў рэгістрацыі Бабарыкі і Цапкалы.