У Кіеве пасля слоў Лукашэнкі пра ЛНР і Пратасевіча заклікалі разарваць дыпадносіны з Мінскам

Палітыка

У Вярхоўную раду Украіны паступіла прапанова разарваць дыпламатычныя адносіны з Беларуссю. Пра гэта сёння, 10 жніўня, паведаміў дэпутат украінскага парламента і лідар міжфракцыйнага аб'яднання (МФА) «За дэмакратычную Беларусь» Аляксей Ганчарэнка.

2b2825812f9c3a67127831d8d37d8.png

«Дыктатар Лукашэнка пацвердзіў, што асабіста даў дазвол на допыт Рамана Пратасевіча тэрарыстамі з так званай ЛНР. Гэта яўка з павіннай. Лукашэнка, які сілай захапіў і ўтрымлівае ўладу ў Беларусі, прызнаў, што супрацоўнічае з тэрарыстычнымі «рэспублікамі», — напісаў Аляксей Ганчарэнка на сваёй старонцы ў фэйсбуку.

Паводле яго слоў, «яшчэ месяц таму атрымаў адказ на свой зварот, падтрыманы калегамі-дэпутатамі, ад Генпракуратуры, што там дэталёва вывучаюць супрацоўніцтва Лукашэнкі з тэрарыстамі т. зв. ЛНР».

«Трэба рухацца далей і адкрываць справу! Акрамя таго, наша МФА «За дэмакратычную Беларусь» у сувязі з дзеяннямі Лукашэнкі зарэгістравала ў Радзе пастанову аб поўным спыненні дыпламатычных стасункаў з рэжымам Лукашэнкі... Таксама падаў Зяленскаму хадайніцтва аб неабходнасці далучэння да новых санкцый ЕС супраць Беларусі, на што атрымаў адказ, што РНБА разгледзіць гэтае пытанне», — паведаміў Ганчарэнка.

Дэпутат Вярхоўнай рады таксама папрасіў офіс генпракурора Украіны, Савет нацыянальнай бяспекі і офіс прэзідэнта «звярнуць увагу на заявы Лукашэнкі і як мага хутчэй прыняць меры».

«Адкрыць крымінальную справу, увесці санкцыі, спыніць дыпламатычныя адносіны і нарэшце афіцыйна не прызнаць дыктатара прэзідэнтам Беларусі», — падкрэсліў ён.

Нагадаем, Украіна афіцыйна не прызнае Лукашэнку прэзыдэнтам Беларусі і заяўляе пра гатоўнасць увесці санкцыі, аналагічныя еўрапейскім. У сваю чаргу, у Мінску заяўляюць аб тым, што гатовыя аднавіць дыялог з Кіевам. 9 жніўня падчас «Вялікай размовы» Аляксандр Лукашэнка заявіў, што ў Мінск прыязджалі прадстаўнікі Луганскай Народнай Рэспублікі для правядзення следчых дзеянняў з затрыманым у маі журналістам Раманам Пратасевічам, які браў удзел у баявых дзеяннях на Данбасе.

Паводле eadaily.com.